အရည်အချင်းပြည့်ဝတဲ့ ဝန်ထမ်းကောင်းဖြစ်ဖို့

စာဖတ်သူလေးဟာ ဘယ်အလုပ်ခွင်ပဲရောက်ရောက် အလုပ်ရှင်တိုင်းသဘောကျရတဲ့ ဝန်ထမ်းကောင်းတစ်ယောက် ဖြစ်ချင်ပါသလား။ လူတိုင်း ကိုယ့်အလုပ်ရှင်သဘောကျတဲ့ ဝန်းထမ်းကောင်းဖြစ်ချင်ကြမှာပါ။

ထူးချွန်တဲ့ဝန်ထမ်းတစ်ယောက်ဖြစ်ဖို့ရာ ကိုယ်လုပ်ကိုင်တဲ့အလုပ်အပေါ် ချစ်မြတ်နိုးစိတ်အပြည့်ရှိရပါမယ်။ စာဖတ်သူလေးအနေနဲ့ အလုပ်ကိုချစ်မှ အလုပ်ကလည်း စာဖတ်သူလေးကိုပြန်ပြီး ချစ်နိုင်မှာပါ။

စာဖတ််သူလေးဟာ အလုပ်ခွင်မှာ အရည်အချင်းပြည့်ဝတဲ့ ဝန်ထမ်းကောင်းတစ်ယောက် ဖြစ်ချင်တယ်ဆိုရင်တော့ အခုကျွန်တော်ပြောပြမယ့်အချက်လေးတွေကို လိုက်နာဆောင်ရွက်ကြည့်ပါနော်။ တာဝန်ကျေတာထက်ပိုတဲ့ အရည်အချင်းပြည့်ဝတဲ့ ဝန်းထမ်းကောင်းတစ်ဦးဖြစ်လာမှာ မလွဲဧကန်ပါပဲခင်ဗျာ။

အရည်အချင်းပြည့်ဝတဲ့ဝန်ထမ်းကောင်းဖြစ်ဖို့ လိုက်နာရမယ့်အချက် (၅) ချက်

(၁) စေတနာထား လုပ်ကိုင်ပါ

ကိုယ်လုပ်နေတဲ့အလုပ်အပေါ်မှာ စေတနာထားပြီးလုပ်ကိုင်ပါ။ ကိုယ်ဟာဝန်ထမ်းဆိုပေမယ့်လည်း ကိုယ်ရဲ့ ကိုယ်ပိုင်အလုပ်တစ်ခုလို သဘောထားပြီး အစစအရာရာစေတနာတရားရှေ့ထားပြီး လုပ်ဆောင်သင့်တာဖြစ်ပါတယ်။

စေတနာဆိုတာ ရောင်ပြန်ဟပ်စေတာကြောင့် အလုပ်အပေါ် စေတနာထားသလောက် အလုပ်ကလည်း စာဖတ်သူလေးအပေါ် ပြန်လည် အကျိုးသက်ရောက်စေမှာပါ။

(၂) တာဝန်ယူမှုတာဝန်ခံမှုရှိပါ

ကိုယ်လုပ်ကိုင်နေတဲ့ အလုပ်တစ်ခုအပေါ် တာဝန်ယူမှုတာဝန်ခံမှုအပြည့်ရှိခြင်းဟာ ဝန်ထမ်းကောင်းတိုင်းမှာ မရှိမဖြစ်လိုအပ်တဲ့ အချက်တစ်ခုပါ။

ကိုယ်လုပ်လိုက်တဲ့ကိစ္စတစ်ခုမှာ အမှားပါခဲ့ရင်တောင် တခြားသူအပေါ်အပြစ်တင်ခြင်း၊ ခေါင်းရှောင်ခြင်း၊ မသိကျိုးကျွန်ပြုခြင်းများ ဘယ်တော့မှမပြုလုပ်သင့်ပါဘူး။ ဖြစ်လာတဲ့အကျိုးရလဒ်ကိုပဲ အကောင်းဆုံးဖြေရှင်းဖို့ နည်းလမ်းရှာရမှာဖြစ်ပါတယ်။

(၃) အချိန်ကိုတန်ဖိုးထားပါ

အချိန်ကို လေးစားတန်ဖိုးထားတဲ့ သူတိုင်းအတွက် အောင်မြင်မှုဆိုတာ လက်တစ်ကမ်းအလိုမှာရှိနေပါတယ်။ ဘာလုပ်လုပ်ကြိုတင်ပြင်ဆင်မှုရှိပြီး အချိန်ကိုအကျိုးရှိစွာစီမံခန့်ခွဲတက်ခြင်းဟာ တိကျသေချာတဲ့ လုပ်ဆောင်မှုမျိုး ဖြစ်စေမှာဖြစ်ပါတယ်။

ဒါကြောင့် စာဖတ်သူလေးအနေနဲ့ အချိန်ကို တန်ဖိုးထားလုပ်ဆောင်တဲ့အကျင့်ကိုလေ့ကျင့်ယူပါ။

(၄) စေ့စပ်သေချာမှုရှိပါ

အသေးအမွှားကိစ္စလေးတွေကအစ စေ့စပ်သေချာမှုရှိရင် အမှားဆိုတာဖြစ်မလာနိုင်သလို မတော်တဆအမှားတစ်ခုခုဖြစ်ပေါ်ခဲ့ရင်လည်း ကြီးကြီးမားမားဆုံးရှုံးမှုမျိုးကြုံရမှာမဟုတ်ပါဘူး။

ဘာပဲလုပ်လုပ် သေချာမှုရှိအောင် ပြန်လည်စစ်ဆေးတဲ့အကျင့်ကိုလက်ကိုင်ထားပါ။ အလုပ်ခွင်မှာ စေ့စပ်တဲ့သူတစ်ယောက်ဟာ ဘဝရဲ့အရေးကြီးအခန်းကဏ္ဍတွေမှာလည်း စေ့စပ်မှုရှိတဲ့အကျင့်ကောင်းတစ်ခု ရရှိစေမှာဖြစ်ပါတယ်။

(၅) ပေါင်းသင်းဆက်ဆံရေးကောင်းပါ

ဝန်ထမ်းကောင်းတို့မည်သည် အလုပ်ခွင်မှာ ပေါင်းသင်းဆက်ဆံရေး ကောင်းမွန်ရုံသာမက အလုပ်ခွင်ပြင်ပမှာလည်း ပေါင်းသင်း ဆက်ဆံရေးကောင်းမွန်လိုပါတယ်။

လူတစ်ယောက်အတွက် ပေါင်းသင်းဆက်ဆံရေးဟာ အခရာကျတယ်လို့ဆိုနိုင်ပါတယ်။ အရေးကြီးတဲ့လုပ်ငန်းဆောင်တာတွေကို လူအများနဲ့ပူးပေါင်းဆောင်မယ်ဆိုရင် လျင်မြန်လွယ်ကူစွာပြီးစီးနိုင်သလို အောင်မြင်တဲ့ရလဒ်တစ်ခုကို ပိုင်ဆိုင်စေမှာဖြစ်ပါတယ်။

ဝန်ထမ်းကောင်းဆိုတာ နောင်တချိန်မှာ အလုပ်ရှင်ကောင်းဖြစ်ပါတယ်ခင်ဗျာ။

နွေဦးအက္ခရာ ( May 12,2024 . 8:50 PM )