❝ဈေးရောင်းခြင်း အနုပညာ❞

ဒီနေ့ မြရေးသွားမယ့် "ဈေးရောင်းခြင်း အနုပညာ" ဆောင်းပါးလေးက "ဈေးရောင်းတယ်" ဆိုတာ အသက်မွေးဝမ်းကြောင်းအတွက် ဈေးရောင်းနေတဲ့သူတွေအတွက်ပဲ အရေးပါတာမျိုးမဟုတ်ဘဲ လူတိုင်းအတွက် အရေးကြီးပါတယ်။

ဈေးရောင်းတဲ့သူတွေပဲ သူတို့ကုန်ပစ္စည်းတွေ ရောင်းထွက်ဖို့အတွက် အရောင်းပညာကို တတ်မြောက်ထားသင့်တာ မဟုတ်ပါဘူးရှင်။ လူတိုင်းက ဈေးဝယ်သူတွေ ဖြစ်ကြသလို ဈေးရောင်းသူတွေရဲ့ ခံစားချက်နဲ့ အတွေ့အကြုံတွေကိုလည်း သိထားဖို့လိုပါတယ်။ ဒီလိုမှ နှစ်ဦးနှစ်ဖက် ကိုယ်ချင်းစာစိတ်ထားမိပြီး ဈေးဝယ်သူများက ဈေးရောင်းသူအပေါ်မှာ ဈေးတအား မစစ်မိသလို၊ ဈေးရောင်သူကလည်း အမြတ်အများကြီး မတင်မှာပေါ့ရှင်။

အရောင်းပညာကို အဓိပ္ပာယ်ဖွင့်ဆိုရမယ်ဆိုရင် Customerတွေရဲ့ လိုအပ်ချက်တွေနဲ့ လိုအင်ဆန္ဒတွေကို ခွဲခြမ်းစိတ်ဖြာပေးပြီး ကိုယ့်ရဲ့ ကုန်ပစ္စည်း (သို့) ဝန်ဆောင်မှုတွေကို သူတို့ ဝယ်ယူသုံးစွဲချင်လာအောင် ဆွဲဆောင်ရတဲ့ အနုပညာတစ်ရပ်ပဲ ဖြစ်ပါတယ်ရှင်။

ဒါ့ကြောင့် ယခု မြပြောသွားမယ့် အရောင်းပညာရပ်ဆိုင်ရာမှာ အခြေခံကျတဲ့ အချက်(၆)ချက်ကို သိရှိထားမှသာလျှင် လူမှုပတ်ဝန်းကျင်မှာ လူရေလည်သူတစ်ယောက် ဖြစ်ပါလိမ့်မယ်ရှင်။

• (၁) ရှာဖွေပါ

ဈေးရောင်းတော့မယ်ဆိုရင် ပထမဦးဆုံး လုပ်ရမှာကတော့ ဈေးကွက်ရှာဖွေရပါမယ်ရှင်။ ကိုယ့်ရဲ့ ကုန်ပစ္စည်းတွေကို ဝယ်ယူသုံးစွဲနိုင်မယ့် အလားအလာရှိတဲ့ Customerတွေကို ရှာဖွေရပါမယ်။ အဲ့ဒီနောက်မှာ သူတို့က ဒီပစ္စည်းကို လိုအပ်လား/မလိုအပ်ဘူးလား ဆိုတာကို လေ့လာဆန်းစစ်ပြီး ဝယ်ဖို့အတွက် တတ်နိုင်တဲ့ ငွေကြေးပမာဏ ရှိရဲ့လားဆိုတာကို ဆုံးဖြတ်ကြည့်ရပါမယ်။

• (၂) ပြင်ဆင်ထားပါ

ဈေးကွက်ရှာဖွေပြီးပြီဆိုတာရင် နောက်တစ်ဆင့် ကိုယ့်ပစ္စည်းကို ဝယ်ယူသုံးစွဲဖို့ အလားအလာရှိတဲ့ Customerတွေရဲ့ ယေဘုယျ အမူအကျင့်တွေ၊ သူတို့ရဲ့ အဓိက လိုအပ်ချက်တွေ၊ ကိုယ့်ကုန်ပစ္စည်းရဲ့ အားသာချက်၊ အားနည်းချက်တွေ အစရှိတဲ့ လိုအပ်တာမှန်သမျှကို ကြိုတင်ပြင်ဆင်ထားရပါမယ်ရှင်။ ပိုပြီးပြင်ဆင်ထားလေ ဈေးရောင်းတဲ့အခါ ပိုပြီးလွယ်လွယ်ကူကူ ရောင်နိုင်လေ ဖြစ်တာပေါ့ရှင်။

• (၃) ချဉ်းကပ်ခြင်း

အဲ့ဒီနောက်မှာတော့ Customerတွေကို ကိုယ့်ရဲ့ကုန်ပစ္စည်းရောင်းဖို့အတွက် စတင်ပြီး ချဉ်းကပ်လို့ ရပါပြီရှင်။ ချဉ်းကပ်တဲ့နေရာမှာ လွယ်ကူရိုးရှင်းတဲ့ နည်းလမ်းတစ်ချို့ကတော့ ဖုန်းဆက်တာ၊ လူချင်းတွေ့ဆုံတာမျိုးတွေ လုပ်လေ့ရှိကြပါတယ်။ Customerတွေကို အကောင်းဆုံး ချဉ်းကပ်နိုင်ဖို့ နည်းလမ်းတွေကတော့ တန်ဖိုးကြီး လက်ဆောင်တွေပေးပြီး ချဉ်းကပ်တဲ့ Premium Approach, သူတို့ရဲ့ အခက်အခဲ၊ ပြဿနာတွေနဲ့ လိုအပ်ချက်တွေကို မေးမြန်းပြီး ချဉ်းကပ်တဲ့ Question Approach, ကိုယ့်ကုန်ပစ္စည်းကို နမူနာ/အစမ်း ပေးသုံးတာတွေ ပြုလုပ်ပြီး ချဉ်းကပ်တဲ့ Product Approach အစရှိတဲ့ နည်းလမ်းတွေကို ကိုယ့်ရဲ့ ကုန်ပစ္စည်း အမျိုးအစားအလိုက် အသုံးပြုနိုင်ပါတယ်ရှင်။

ဒီချဉ်းကပ်ခြင်းအဆင့်က တန်ဖိုးကြီးကုန်ပစ္စည်းရောင်းချကြမယ့် ဈေးရောင်းသူများအတွက် ပိုသင့်တော်ပါတယ်ရှင်။ သာမာန် တစ်နေ့စာ‌တစ်နေ့ ဈေးရောင်သူများအတွက်ကတော့ သိပ်လုပ်စရာမလိုပါဘူးရှင်။

Product Approachနဲ့ ပတ်သတ်ပြီးတော့ မြ ဖတ်ဖူးတဲ့ ဆရာဗန်းမော်သိန်းဖေ ဘာသာပြန်ထားတဲ့ "အိပ်မက်လှလှ အောင်မြင်သောဘဝ" စာအုပ်ထဲမှ ကားအရောင်းသမားတစ်ယောက်အကြောင်းလေးကို ဥပမာထား ရေးသားလိုက်ရပါတယ်ရှင်။ သူက သူ့ကားတွေ ရောင်းအားနှေးသွားတဲ့အခါမှာ ခရီးသွားများတဲ့ ပင်လယ်ကမ်းခြေဒေသတွေ၊ အပန်းဖြေစခန်းတွေကို သူ့ရဲ့ကားတွေနဲ့ ပတ်မောင်ပြီး ဝယ်ယူလိူသူများကို ပတ်စီးပေးတာတို့၊ အစမ်းမောင်းခိုင်းတာတို့ လုပ်ဆောင်ပြီး ကား‌‌အရောင်းနှုန်းကို ပြန်လည်မြှင့်တင်နိုင်ခဲ့ပါတယ်တဲ့ရှင်။

• (၄) တင်ဆက်ခြင်း

တင်ဆက်ပြသခြင်းအဆင့်မှာ ကိုယ့်ရဲ့ ကုန်ပစ္စည်း (သို့) ဝန်ဆောင်မှုက Customerတွေရဲ့ လိုအပ်ချက်နဲ့ ကိုက်ညီကြောင်းကို သေသေချာချာ တင်ပြနိုင်ရပါမယ်။ အဲ့လိုလုပ်တဲ့နေရာမှာ စကားလုံးရွေးချယ်မှုက အရေးအကြီးဆုံးဖြစ်ပြီးတော့ စကားပြောတဲ့အခါမှာ Customer‌တွေ စိတ်ဝင်စားပြီး ဝယ်ယူချင်စိတ်တွေ တဖွားဖွား ဖြစ်ပေါ်လာအောင် တက်တက်ကြွကြွ ပြောဆိုတတ်ဖို့ကလည်း အရေးကြီးတဲ့ အချက်တစ်ချက်ပေါ့ရှင်။ ဒါ့အပြင် Power Point, Presentationတွေနဲ့ တင်ဆက်နိုင်ရင်တော့ အကောင်းဆုံးပေါ့ရှင်။ ဒါပေမဲ့ ရိုးရိုးသာမန် ဈေးရောင်သူများဖြစ်ကြတဲ့ ဟင်းသီးဟင်းရွက်ရောင်းသူတွေအတွက်ကတော့ ပါဝါပွိုင့်ကြီးနဲ့ ‌ရောင်းနေစရာ မလိုပါဘူးရှင်။ ?

• (၅) အရောင်းပိတ်ခြင်း

Customer‌တွေဆီက ကိုယ့်ရဲ့ ကုန်ပစ္စည်းကို ဝယ်ဖို့ ဒါမှမဟုတ် မဝယ်တော့ဖို့ ဆုံးဖြတ်ချက်ချပြီးတဲ့အခါမှာ အရောင်းပိတ်ခြင်းကို ဆောင်ရွက်ရပါတော့မယ်။ အဲဒီအချိန်မှာ ဝယ်ဖို့ဆုံးဖြတ်ထားတဲ့ Customerတွေကို အမြဲတမ်း ကိုယ့်ဆီကပဲ ထပ်ဝယ်ချင်လာအောင် ဆွဲဆောင်ထားနိုင်သလို မဝယ်ဖို့ ဆုံးဖြတ်ထားတဲ့ Customerတွေကိုလည်း ဆုံးဖြတ်ချက်ပြောင်းပြီး ဝယ်ချင်လာအောင် ထပ်မံဆွဲဆောင်နိုင်ပါတယ်ရှင်။ ဝယ်သွားတဲ့ Customerတွေအတွက် နောက်တစ်ခေါက် ထပ်လာဝယ်ရင် ဘယ်လိုမျိုး

Discountတွေ ရရှိနိုင်ကြောင်း၊ မဝယ်ဖို့ ဆုံးဖြတ်ထားတဲ့ Customerတွေအတွက်ဆိုရင်တော့ "Discountက ဒီလကုန်ထိပဲ ပေးတော့မှာဖြစ်ကြောင်း၊ လူ(၅)ယောက်၊ (၁၀)ယောက်စာသာ ပစ္စည်းကျန်တော့ကြောင်း" အစရှိသဖြင့် ဆွဲဆောင်းပြီး အရောင်းပိတ်နိုင်ပါတယ်ရှင်။

• (၆) Follow-Up

အရောင်းသမားတစ်ယောက်ရဲ့ တာဝန်က အရောင်းပိတ်ရုံနဲ့ မပြီးသေးပါဘူး။ နောက်ဆက်တွဲအနေနဲ့ ကိုယ့်ကုန်ပစ္စည်းကို ဝယ်ယူသွားတဲ့ Customerတွေကို သုံးစွဲရတာ အဆင်ပြေရဲလား၊ ဘယ်လမှာတော့ ဘယ်လိုလျှော့ဈေးတွေ ရှိတယ်ဆိုတဲ့အကြောင်း စတာတွေနဲ့ Follow-Up လုပ်တတ်ရပါမယ်ရှင်။ Customerအသစ်တွေ ရှာရတာထက် ရှိပြီးသား Customerတွေကို ထိန်းထားနိုင်ဖို့က ပိုပြီး အရေးကြီးတာကြောင့် Follow-Up အဆင့်က မဖြစ်မနေ လုပ်ကိုလုပ်ရမယ့် အဆင့်တစ်ဆင့်ပါပဲရှင်။

ဒီတော့ ယခု မြပြောခဲ့တဲ့ အချက်(၆)ချက်က မြေပြင်မှာ ဈေးရောင်းသူဖြစ်ဖြစ်၊ Online Shoppingသမားတွေအတွက်ပဲ ဖြစ်ဖြစ် အသုံးဝင်ပါတယ်ရှင်။ ဒါ့ကြောင့် ဒီအချက်လေးတွေကို လိုအပ်သလို အသုံးပြုကာ ကုန်ပစ္စည်းများ ရောင်းကောင်းကြပြီး မြရဲ့စာဖတ်သူလေးတွေလည်း စီးပွားရေးပညာရှင်များ ဖြစ်ကြပါစေလို့ ဆုတောင်ပေးလိုက်ရပါတယ်ရှင်။

စာဖတ်သူများအားလုံးကို ချစ်ခင်လေးစား ကျေးဇူးတင်လျက်.....

✍️ မြ (စံကားဝါမြေ)

#SarPhat
#Mya_Kyaukpadaung
20.9.2024(Friday)