ပရကထာ ပါရဂူ

စာမျက်နှာ ၃၂၆
ပထမအကြိမ်
စေတနာစာပေ

မိမိအကြောင်းကို မိမိကိုယ်တိုင်ရေးထားတာမျိုးဆိုရင် "အတ္တကထာ" လို့ခေါ်ပြီး သူတပါးအကြောင်းရေးထားတယ်ဆိုရင် "ပရကထာ" လို့ခေါ်ပါသတဲ့။ Autography နဲ့ Biography ကွာခြားသလိုပါပဲတဲ့။

ဆရာကြီးပါရဂူက သူနဲ့လက်လှမ်းမီတဲ့ စာရေးဆရာကြီးတွေအကြောင်းကို တစေ့တစောင်းရေးထားတာပါ။ အမှာစာမှာကတည်းက ကြိုက်သွားတာ။ အိန္ဒိယ ရိုးရာ "သဒ္ဒဝေဓီ " လေးပစ်နည်းနဲ့ ခိုင်းနှိုင်းသွားတာ သိပ်သဘောကျသွားတာပဲ။

ဒီးဒုတ် ဦးဘချိုအကြောင်းဖတ်လိုက်ရတော့ ဒီစာအုပ်ကို လက်ကမချနိုင်ဖြစ်သွားပြီ။။ ရှင်စောပု၊ စောမာလာ ၊ ပုသိမ်စား တို့နဲ့ဇာတ်လမ်းဖွဲ့ထားတဲ့ "ဘွေသီဟာ " ဆိုတဲ့ သမိုင်းနောက်ခံဝတ္ထုတောင်ဖတ်ချင်သွားတယ် ။ တကယ်။

ဆရာကြီးဇေယျပြောသွားတဲ့ စာရေးဆရာ ရဲ့တာဝန်အပေါ် ခံယူချက်ကိုသိပ်သဘောကျမိသလို အမျိုးသားပညာဝန်ဦးဖိုးကျားရဲ့ မျိုးချစ်စိတ်ဓာတ်ပြင်းထန်ပုံကိုလည်းလေးစားမိတယ်။ ဦးဖိုးကျားရဲ့ "ခေတ်မီ မြန်မာရာဇဝင် အကျဉ်းချုပ်တော့ဖတ်ပြီးပြီ ။ "မြန်မာ့ဂုဏ်ရည်" နဲ့ "ငါးရာ့ငါးဆယ်ကောက်နုတ်ချက်များ" တော့မဖတ်ဖူးသေးဘူး။ဖတ်ချင်လိုက်တာ ဆိုတာ။ဒါက တယောက်နှစ်ယောက်ကို ဥပမာပြထားတာပါ။ဆရာဇော်ဂျီ ၊ ဒဂုန်ခင်ခင်လေး၊ လူထုဦးလှ ၊ လူထုဒေါ်အမာ ၊ သိန်းဖေမြင့် ၊ ဂျာနယ်ကျော်မမလေး ၊ နန္ဒ ၊ ဒဂုန်တာရာ စသဖြင့် အဲ့ဒီလိုပညာရှင်စာရေးဆရာ ကြီးတွေ ၂၁ ယောက်ရဲ့အကြောင်းမို့ဖတ်ရတာလေးစားအားကျဖွယ်ရာ ဖြစ်ပါတယ်။

ကျွန်မစိတ်ထဲ ဖတ်ရတာ မှတ်မှတ်ထင်ထင်အရှိဆုံးနဲ့ အလွယ်ကူဆုံးကတော့ "အိုးဝေဦးညိုမြ " အကြောင်းပါပဲ။ လူရဲ့ပုံစံနဲ့ ကလောင်အရေးအသားမတူပုံ ၊ သူရေးတဲ့ စာတွေဟာ ဟင်းအမည်စုံတဲ့ထမင်းပွဲနဲ့တူပုံကို ရေးသားထားတာတွေက စိတ်ထဲစွဲနေပါတယ်။ "ကုန်းဘောင်ရှာပုံတော်" ကို အလွန်ကြိုက်ထားတာလည်း ပါမယ်ထင်တယ်။

ဆရာကြီးဗန်းမော်တင်အောင်ကို ပြည်သူ လူထု က သိပ်ချစ်ကြတဲ့အကြောင်းရေးထားတာလည်းဖတ်ရင်းနဲ့ ကိုယ်တောင်လေးစားကြည်ညိုလာမိတယ်။ ကိုယ့်ကိုလေးလေးစားစားဆက်ဆံတဲ့သူကို ကို အလေးစားခံရတဲ့သူက လည်း ပြန်ပြီးချစ်ခင်လေးစားတာဟာ ထုံးစံပါပဲလားလို့ တွေးမိတယ်။ ဆရာကြီး "ဒဂုန်တာရာ " ပါတိတ်အကျီ အဆင်သဘောကျတာကတော့ "ကွမ်းစကားပေါင်းချုပ်" ထဲမှာလည်းတခါ ဖတ်ဖူးတယ်။ အဲ့ဒီလို အရင်ဖတ်တဲ့စာအုပ်နဲ့ နောက်ဖတ်တဲ့စာအုပ် ချိတ်မိသွားတဲ့ ခံစားချက်ကိုလည်း သိပ်ကြိုက်ပဲ :D

ဒီစာအုပ်ကိုဖတ်ခြင်းအားဖြင့် စာပေပညာရှင်ကြီးတွေရဲ့အကြောင်းသာမက သူတို့ရဲ့ထင်ရှားတဲ့လက်ရာတွေကိုသိသွားမယ့်အပြင် သူတို့လက်ရာတွေထဲက စာအချို့ကိုပါ မြည်းစမ်းဖတ်ရှုခွင့်ရမှာမို့ စာချစ်သူတို့အကြိုက် စာအုပ်ကောင်းတအုပ်ဖြစ်မှာသေချာပါတယ်။

ဆရာကြီး ပါရဂူ စာအုပ်တွေက (ကျွန်မအတွက်) ဖတ်ရတာ အာရုံလည်းစိုက်ရတယ်။ အချိန်လည်းအတော်ပေးရတယ်။ အမှန်အတိုင်းပြောရရင် နည်းနည်းလည်းငိုက်တယ် :D ။ ဒါကြောင့်များများ မှတ်မိအောင်ဆိုပြီး မှတ်စုတွေရေး တဲ့အပြင် အညွှန်းကိုပါရှည်ရှည်ရေးမိသွားတတ်လို့ပါ။ အညွှန်းရှည်သွားရင်ခွင့်လွှတ်ကြပါနော်၊ ဒါတောင် အများကြီး ပြန်ဖျက်ထားသေးတယ် ။

ဝတ်မှုံလေး (စာကြမ်းပိုး)
www.wuthmonelay.blogspot.com