ကိုယ်ကျင့်အဘိဓမ္မာ အရှင်ဇနကာဘိဝံသ

စာမျက်နှာ ၃၅၃
သတ္တရသမအကြိမ်
မဟာဂန္ဓာရုံစာပေ

ဆရာတော်ကြီးရဲ့ကျမ်းစာအုပ်တွေက Spoiled ဆိုတာမရှိပဲ ဖတ်ရင်ဖတ်သလောက် အကျိုးရတယ်လို့ ယူဆကာ မကြာခဏလည်း ပြန်ဖတ်သင့်တယ် လို့ထင်တာမို့ အညွှန်းကို များများလေးရေးပါ့မယ်နော်။ ဓမ္မဒါနလည်းဖြစ်အောင်ပါ။ လျှာရှည်သလိုဖြစ်သွားရင် တောင်းပန်ပါတယ်ရှင့်။ပြီးတော့ ဒီလိုပြန်ရေးဖို့ဖတ်မှလည်းမှတ်မိလွယ်လို့ပါ။

ကျွန်မအနေနဲ့ ဒီစာအုပ်ကိုတော်တန်ရုံစိတ်နှစ်ပြီးဖတ်လို့မရခဲ့ဘူး။ ဖတ်ပြီးတာနဲ့ သဘောပေါက်အောင်ပြန်တွေးရတယ်။ ဥပမာ - ပရမတ္ထ တရား လေးပါးထဲက "စိတ်" ကိုပြောမယ်ဆိုရင် အဲ့ဒီ "စိတ်" အကြောင်းကို ဖတ်နေတဲ့အချိန်တရားမှတ်သလို လိုက်တွေးနေရတာ..အခြား ဇာတ်လမ်းတို့ဘာတို့ဆို ရင် ဘေးကအာရုံကို သတိပြုလိုက်တာနဲ့ စာအုပ်ထဲကအကြောင်းအရာနဲ့ ဝေးကွာသွားတာမျိုးမဖြစ်ဘူး။ဒီစာအုပ်ကျမရဘူး :D ။ ကျွန်မအနေနဲ့ တွေ့ကြုံရတာလေး ပြောပြတာပါ။ အထူးသဖြင့် လူခြေတိတ်ချိန်မှာ အချိန်ယူပြီး ထပ်ခါထပ်ခါ ဖတ်ခဲ့ရကာ ကုသိုလ်တွေလည်း အများကြီးရခဲ့ပါတယ် ??

နေ့စဉ်နေ့တိုင်းကိုယ်တွေးနေတဲ့ စိတ်တွေဟာ ကောင်းတဲ့စိတ်လား ၊ မကောင်းတဲ့စိတ်လား ခွဲခြမ်းစိတ်ဖြာပြီး ကောင်းတဲ့စိတ်လေးများများဖြစ်အောင် ဆောင်ရွက်ဖို့ သတိထားမိသွားပါတယ်။ကျွန်မ ပဋ္ဌာနပါဠိကိုရွတ်နေတာ ဆယ်ကြိမ်ရှိပြီ။ဒီစာအုပ်ဖတ်လိုက်မှပဲ အဟိရိက ၊ အနောတ္တပ္ပ စတာတွေဟာစေတသိက်တွေပါလား ..ဆိုတာနဲ့ စေတသိက် ၁၄ ပါးအကြောင်းကို သေချာသိသွားလို့အကျိုးကြီးလှပါတယ်။

အတ္တာနုဝါဒဘေး ၊ ပရာနုဝါဒဘေး ၊ ဒဏ္ဍဘေး ၊ ဒုဂ္ဂတိဘေး တို့ကိုလည်းတွေးကြောက်သွားတယ်။ မိမိမှာ မရှိတဲ့ဂုဏ်ကို ရှိဟန်ဆောင်တဲ့လောဘ တရားဖြစ်တဲ့ သာဌေယျ အကြောင်းလည်းသိရှိလိုက်ရတယ်။ဇာတိမာန် ၊ ဓနမာန် ၊ ပညာမာန် ၊ အဆင်းမာန်တွေရဲ့အန္တရာယ်တွေအကြောင်း ၊ဣသာရဲ့ကြောက်စရာကောင်းပုံ ၊ အတ္တုက္ကံသန ပရဝမ္ဘန အကြောင်း ၊ မစ္ဆရိယငါးမျိုး အကြောင်း၊ ထိနမိဒ္ဓ အကြောင်း ၊ အကုသိုလ်ကိုခြယ်လှယ်တဲ့ စေတသိက် များအကြောင်း များစွာ သိရှိပြီး ဆင်ခြင်မိရပါတယ်။

ကုသိုလ်ကိုခြယ်လှယ်တဲ့ သဒ္ဓါ ၊ မေတ္တာ ၊ သတိ ၊ ကရုဏာမှစ သမ္မာအာဇီဝ အဆုံး စေတသိက်များအကြောင်း ၊ မုဒ္ဓပ္ပသန္တ ဆိုတဲ့ဖျင်းအသောကြည်ညိုမှုအကြောင်း ၊ ဟီရိ ဩတ္တပ္ပ အတုနှင့်အစစ်အကြောင်း ၊ ဝိရတိ ၃ ပါးအကြောင်း ၊ အရင်ဖတ်ဖူးခဲ့တဲ့ ပဋ္ဌာန်းစာအုပ်တွေထဲက ဝိတက် ၊ ဝိစာရ တို့ အကြောင်းတွေလည်းပြန်ဖတ်လိုက်ရပါတယ်။

သံဃိကဒါနနဲ့ ပုဂ္ဂလိက ဒါန ကွာခြားပုံ ၊ ပုဗ္ဗ မုဥ္စအပရစေတနာများ အကြောင်း ၊ ဒွိဟိတ် တိဟိတ် ကုသိုလ်အခွဲ ၊ ဟီန မဇ္ဈိမ ပဏီတ ဒါနများ ၊ဒါန သီလ ဘာဝနာတို့ရဲ့အကျိုးများ ၊ တရားဟောတဲ့နေရာမှာ အသံသာအောင်ဟောတဲ့အတွက် ဖြစ်ရတဲ့အပြစ်ငါးပါး ၊ ဓာတ်ကြီးလေးပါးအကြောင်းနဲ့ ဘုံများအကြောင်း စသည်တို့မှာလည်းမှတ်သားဖွယ်ရာဖြစ်ပါတယ်။

ဇနီးမောင်နှံ နှစ်ယောက်မှာ တယောက်ရဲ့ကုသိုလ်ကို တယောက်အားပေးပြီး တယောက်က အကုသိုလ်လုပ်ရင် တားမြစ်ဖို့ ၊ "ကံတူအကျိုးပေး အကြောင်း သာဓကများ ၊ ပယောကသမ္ပတ္တိအရေးကြီးပုံများ မှာလည်း လိုက်နာဖွယ် ဖြစ်ပါတယ်။

မကောင်းတာလုပ်ရင် မကောင်းတာလုပ်တဲ့သူရဲ့တာဝန်ပဲ။ သူမကောင်းတာ သူ့တာဝန်။သူမကောင်းလို့ ကိုယ်မကောင်းတာမျိုး ဖြစ်စရာမလိုပါလား။ အဲ့ဒါမျိုးလေးတွေ လည်း တွေးမိပါတယ်။

ဒီစာအုပ်ထဲမှာ ခေတ်ဆန်ဆန်တရားကိုနာမယ့်အစား ကျမ်းစာတွေဖတ်ပါဆိုပြီး ဆရာတော်ကြီးညွှန်းထားတဲ့ကျမ်းစာတွေရှိတယ်၊အဲ့ဒါတွေကတော့ ဇိနတ္ထပကာသနီ ၊ ဗုဒ္ဓဝင် ၊ သံဝေဂဝတ္ထု ဒီပနီ ၊ ငါးရာ့ငါးဆယ်ဇာတ်တော်ကြီးများနဲ့ ရှေးဆရာတော်ကြီးတွေစီစဉ်တော်မူအပ်တဲ့ ကျမ်းစာများ ဖြစ်ပါတယ်။ ဖတ်ဖို့တိုးသွားတာပေ့ါ :D

အရမ်းကြီးခက်ခက်ခဲခဲမဟုတ်ပဲဖတ်နိုင်တဲ့ ဗုဒ္ဓဘာသာဝင်တွေဖတ်ကိုဖတ်သင့်တဲ့ ဆရာတော်ကြီးရဲ့ နာမည်ကြီးကျမ်းစာအုပ်သုံးအုပ်ရှိတယ်။ အားလုံးသိကြလောက်ပါတယ်။ ရတနာ့ဂုဏ်ရည်ရယ် ၊ ကိုယ်ကျင့်အဘိဓမ္မာရယ် ၊ အနာဂတ်သာသနာရေး ရယ် ။ ရတနာ့ဂုဏ်ရည်ဖတ်ပြီးပြီ။ အညွှန်းလေးလည်းရေးထားပေးတယ်။အခုကိုယ်ကျင့်အဘိဓမ္မာလည်းပြီးပြီ။ အနာဂတ်သာသနာရေးကတော့မဝယ်ရသေးဘူး။လကုန်မှဝယ်တော့မယ် :D ဖတ်ကြည့်ကြပါလို့ တိုက်တွန်းချင်ပါတယ်။စျေးလည်းတော်တယ် ။ ဝယ်လို့လည်းလွယ်ပါတယ်။

သူတပါး အထင်ကြီးရုံကောင်းတဲ့ သူတော်ကောင်းမျိုးထက် မိမိကိုယ်မိမိ အထင်ကြီးတဲ့ သူတော်ကောင်းမျိုးအဖြစ်ကို နှစ်နှစ်ကာကာ အလိုရှိဖို့ ဗုဒ္ဓဘာသာဝင်တွေအတွက် ဖတ်ဖို့လိုအပ်တဲ့စာအုပ်တစ်အုပ်လို့ပြောပါရစေ။

အညွန်းကတော်တော်ရှည်သွားတယ်၊ကျွန်မပြန်ဖတ်ရင်လည်း ပြန်သတိရ ဆင်ခြင်နိုင်အောင်လို့ပါ ။

ဝတ်မှုံလေး (စာကြမ်းပိုး)
www.wuthmonelay.blogspot.com