အစိမ်းတစ္ဆေရှိသလား

ကောဇာသက္ကရာဇ် ၁၂၇၅လောက်က ပြင်
သစ်ပညာရှင်တချို့ လယ်တီဆရာတော်ဘုရားကြီးအား ဗုဒ္ဓဘာသာနှင့်ပတ်သက်လို့ သူတို့မရှင်းတဲ့အောက်ပါအချက်ငါးခု မေးလျှောက်ကြ​
၏။
၁။သားသမီးတို့​၏ကံ (ကမ္မ)သည် ၎င်းတို့​၏ မိဘများ ကံ (ကမ္မ)နှင့်တူ မတူ။
၂။မိဘက နူသည်ဖြစ်စေ,ရောဂါဆိုးကပ်သည်ဖြစ်စေ,ရူးသည်ဖြစ်စေ၊ထိုသူမှပေါက်ဖွားသောသားသမီးတို့မှာ ဆေးကျမ်းပညာအရ ကူးတတ်သည်၊ရူးတတ်သည် ဆိုကြ
သည် ကံ(ကမ္မ)ချင်းမတူကြလျင် မည်သည့်အတွက်ကြောင့် နူနိုင်, ရူးနိုင်,ကူးနိုင်ကြပါသနည်း။
၃။ဝိညာဉ်သည် အတွယ်ရှိပါမှဖြစ်ပါသလား၊ မတွယ်မီအလျောက်ဖြစ်နေပါသလား၊ အစိမ်းတစ္တေဖြစ်သည်ဆိုကြသော စကားမှန်ပါသလား။
၄။"လူဝင်စား"ဟူ၍လောက၌ ပြောရိုးဆိုရိုးရှိကြ​၏။ဝင်စားခြင်းအကြောင်းသည် ဗုဒ္ဓဘာသာတရားတော်တွင် သက်ဝင်ခြင်းရှိပါသလား။
၅။အဘိညာငါးပါး

၁။ဣဒ္ဓိဝိဓ အဘိညာ
၂။ဒိဗ္ဗသောတ အဘိညာ
၃။စေတောပရိယ အဘိညာ
၄။ပုဗ္ဗေနိဝါသ အဘိညာ
၅။ဒိဗ္ဗစက္ခု အဘိညာ
ဤငါးပါးတို့သည့် မြတ်စွာဘုရားမှတစ်ပါး ရဟန္တာ-အစရှိသော အရိယာ သာဝကများနှင့်
ဆက်ဆံပါသေး​၏လား။
ထိုငါးချက်ထဲမှာ နံပါတ်သုံးပုစ္ဆာကို ကိုယ်တိုင်
ရှင်းရှင်းလင်းလင်းသိချင်နေတာကြာပြီ၊ဆရာတော်ဘုရားကြီး​၏ မိန့်ကြားချက်ဖတ်ရတော့မှ အမြင်ရှင်းသွားတော့တယ်။နံပါတ်သုံးပုစ္ဆာရဲ့သဘောက "ဝိညာဉ်သည် အတွယ်ရှိမှဖြစ်ပါသလား ၊မတွယ်မီအလျောက်ဖြစ်နေပါသလား ဟူသောအမေးသည် အရပ်စကားနဲ့ပြောရရင် လူသေရင် ထိုလူသည် သူရောက်ရမည့် နောက်ဘဝသို့တမ်းရောက်ပါသလော၊ သို့တည်းမဟုတ် ကြားခံဘဝမှာ ခဏနေပြီးမှ သူရောက်ရမည့်နောက်ဘဝသို့ရောက်ပါသလော"မေးတဲ့သဘောမျိုးဖြစ်​၏။
"လယ်တီဆရာတော်ဘုရားကြီးဖြေကြားပုံ"
အကြင်သူသည် လူ့ပြည်မှသေ၍ နတ်ပြည်၌ဖြစ်လေ​၏၊ ထိုသူ၌ လူ့ဘဝအဆုံးနှင့်နတ်ဘဝအစသည် ဌာနအားဖြင့်ဝေးကွာသော်လည်း ကာလအားဖြင့်အခြားမရှိ၊တစ်စပ်တည်း,တစ်ဆက်တည်း စပ်ဆက်
လျက်ဖြစ်​၏။အကြင်သူသည် လူ့ပြည်မှသေ၍ အောက်မဟာအဝိစိငရဲကြီး၌ဖြစ်လေ​၏၊ထိုသူ၌လည်း လူ့ဘဝအဆုံးနှင့် ငရဲဘဝအစသည် ဌာနအားဖြင့်ကွာဝေးသော်လည်း ကာလအားဖြင့်အခြားမရှိ၊လောကမျက်မြင်အားဖြင့် မဟာပထဝီ မြေအထု ခုခံကွယ်ခြား၍ နေသော်လည်း ကံဟူသောနာမ်ဓမ္မ​၏ အစွမ်းသတ္တိကို ထိုမဟာပထဝီမြေအထု ခုခံကွယ်ခြားနိုင်သည်မဟုတ်၊လူ့ဘဝမှာအဆုံး နာမ်ဓမ္မအဟောင်းချုပ်လျင် မဟာအဝီစိငရဲကြီးမှာအစ,နာမ်ဓမ္မအသစ် ဆက်လက်ဖြစ်ပေါ်လေတော့သည်၊အကြား၌ မျက်တောင်တစ်ခပ် လျှပ်တစ်ပြက် ကြံ့ကြာခြင်းမရှိလေပြီ။
အကြောင်းမူကား-အသီးအသီး သူ့ကံနှင့်သူ့ဘုံ၊သူ့ဘုံနှင့်သူ့ဘဝ သတ်မှတ်ပိုင်းခြားလျက်ရှိလေသောကြောင့်တည်း။
ထိုမှတဖန်"အစိမ်းတစ္ဆေဖြစ်သည် ဆိုကြသောစကား မှန်ပါသလား"ဟူသောအမေးကိုဖြေတော်မူ​၏။
"လယ်တီဆရာတော်ဘုရားကြီး ဖြေဆိုပုံ"
"အစိမ်းတစ္ဆေဖြစ်ကြသည်ဆိုကြသောစကား မှန်ပါသလား"မှန်ပါသလားဟူသောစကားဖြင့် အစိမ်းတစ္ဆေဖြစ်သည်ကိုပင် အန္တရာဘဝဖြစ်သည်ဟု အယူရှိကြသည်ကိုထုတ်ဖော်၍ပြပေ​၏၊ အစိမ်းတစ္ဆေဟူသည် အခြားတပါးမဟုတ်၊နတ်ဘဝစုတွင် အယုတ်ဆုံးအညံ့ဆုံးဖြစ်သော စာတုမဟာရာဇ်နတ်ဘဝပေတည်း၊လူ့ဘဝ နတ်ဘဝ,ဗြဟ္မာဘဝ,ငရဲဘဝ,တိရစ္ဆာန်ဘဝ,ပြိတ္တာဘဝတို့မှ အလွတ်အလပ်အသီးခြားမဟုတ်ပေ၊ထိုဘဝသို့ရောက်လေသောသူသည် လူနှင့်အလွန်နီးစပ်​၏၊ ထိူဘဝ၌ ဆင်းရဲရန် ကံအခွင့်ကုန်လျင် လူ့ဘုံသို့ပြန်လာနိုင်​၏၊ အခွင့်သင့်ရာအမိဝမ်းမှာ ပဋိသန္ဓေယူနိုင်​၏။
ထိုဘဝကို ချမ်းသာသော နတ်ဘဝမဟုတ်သည့်အတွက်ကြောင့် နတ်ဘဝဟူ၍အယူမရှိကြဘဲ "အန္တရာဘဝ"ဟူ၍ တမျိုးတစ်မည် ထင်မှတ်ကြ​၏၊မြန်မာတို့၌ "အစိမ်းတစ္ဆေ"ဟူသော အမည်တစ်မျိုးနှင့်ခေါ်ကြ​၏။ဗုဒ္ဓဘာသာကျမ်းဂန်တို့၌"ဝိနိပါတိကအသုရာ"ဟူ၍ခေါ်​၏၊နတ်ဘဝစုတွင် အယုတ်ဆုံးအညံ့ဆုံးသော နတ်ဘဝတစ်မျိုးဖြစ်ပေသတည်း၊ လူပြည်မှသေလွန်ကြသူအပေါင်းတို့သည် ထိုဘဝသို့ချည်ရောက်
ကြကုန်သည်မဟုတ်၊အချို့မျှသာရောက်
ကြကုန်​၏၊ရုတ်တရက်အခွင့်နှင့် သေဆုံးကြသော သူများသည် ထိုဘဝသို့ရောက်တတ်ကြ​၏၊မနုဿဂတိ,ဒေဝဂတိ,နိရယဂတိ,တိရစ္ဆာနဂတိ,ပေတဂတိဟူ၍ ဂတိငါးပါတို့မှ အလွတ်အလပ် အသီးအခြားမဟုတ်ပေ။(လယ်တီဆရာတော်ဘုရားကြီး ဦးဉာဏ၊ နိုင်ငံခြားပုစ္ဆာအဖြေပေါင်းချုပ် နှာ၂၈/၂၉/၃၀)
အစိမ်းတစ္ဆေဆိုတာ သုံးဆယ့်တစ်ဘုံထဲမှာ စာတုမဟာရာဇ်နတ်အမျိုးစားထဲမှ ကံအလွန်ညံ့တဲ့နတ်ကိုဆိုလိုတာဖြစ်ပါတယ်၊ ရုတ်တရက်သေဆုံးသူများ ပိုဖြစ်နိုင်တဲ့သဘောပါ၊