အပျော်မယ်များသို့ အရွယ်ကျော်တမ်းချင်း-လူချို(ဘာသာပြန်)✍️

မူရင်းစာရေးသူကတော့ One Hundred Years of Solitude, Love in the Time of Cholera စတဲ့ နာမည်ကြီးလက်ရာတွေရေးသားခဲ့တဲ့ Columbia စာရေးဆရာတစ်ဦးဖြစ်သူ Gabriel García Márquez(ဂေဘရီရေးလ် ဂါစီယာမာရ်ကေ့စ်)ပါ။

သူရဲ့ရေးဟန်လို့ပဲဆိုရမလား တင်ပြတဲ့ရှုထောင့်က တော်တော်ဆန်းပါတယ်။ အသက်ကိုးဆယ်အရွယ် ရှိတဲ့ အဘိုးအိုတစ်ယောက်က အပျိုစင်မလေးတစ်ယောက်နဲ့အိပ်ပြီး သူ့ရဲ့ နှစ်ကိုးဆယ်ပြည့်အထိမ်းအမှတ်ကို ကျော်လွှားချင်ပါတယ်တဲ့။စိတ်မသက်မသာဖြစ်စေတဲ့ဝတ္ထုလို့ စာပေဝေဖန်သူတွေကဆိုထားတယ်။သူတို့ဝေဖန်ချက်ကို စာဖတ်အပြီးမှာ တကယ်ကို စိတ်လိုလက်ရ ထောက်ခံမိပါတယ်။

တစ်နည်းဆိုသော် အချစ်ရဲ့ခမ်းနားပုံကို အဓိပ္ပာယ်ဖွင့်ပြီးဖွဲ့နွဲ့ထားတဲ့ ဝတ္ထုပါပဲ။ဒါ့အပြင် magical realism (မြန်မာလို ပဉ္စလက်သရုပ်မှန်)ဝတ္ထုအမျိုးအစားဆိုတာကိုလည်း ထည့်တွေးပေးဖို့လိုပါလိမ့်မယ်။ဒီဝတ္ထုမျိုးတွေက ဇာတ်လမ်းအသွားက လက်ခံစရာ ကောင်းချင်မှကောင်းမယ် သို့သော်လည်း သဘာဝနဲ့မကွာဟဘဲ ဖြစ်တတ်ပျက်တတ်တဲ့သဘောကို နှိုက်ထုတ်ရေးသားပြတာမျိုးလို့နားလည်ထားပါတယ်။First person’s narrativeနဲ့ဆိုတော့ အသက်ကြီးကြီးအဘိုးအိုရဲ့ဘဝနဲ့သူ့အမြင်ထဲကို တစ်ချက်ဝင်ကြည့်ကြတာပေါ့။

ဇာတ်လမ်းပြန်ပြောရရင် တစ်ချိန်က သတင်းထောက်ဖြစ်ခဲ့တဲ့ အဘိုးကြီးက အသက်ကိုးဆယ်အရွယ်ကိုရောက်တဲ့အခါမှာ ထူးထူးခြားခြားအာသီသဖြစ်လာပါတယ်။အဲ့ဒါကတော့ ‘အပျိုစင်’အပျော်မယ်လေးတစ်ယောက်နဲ့ တစ်ညတာပျော်ပါးချင်တာပါပဲ။သူလိုအရွယ်မှာ ဒီလိုအာသီသမျိုးက ပတ်ဝန်းကျင်အသိုင်းအဝိုင်းရဲ့တံတွေးခွက်ပက်လက်မျောရမယ့်အလုပ်မျိုးဆိုတာကို အဘိုးကြီးက မသိမရှိပါဘူး။သို့ပေမယ့် နှစ်ပေါင်းများစွာ အထီးကျန်မှုဒဏ်ကိုခံစားရပြီးနောက်မှာ ဘယ်သူ့အမြင်ကိုမှဂရုမစိုက်ချင်တော့ဘူး သူလုပ်ချင်ရာလုပ်လိုက်ချင်တဲ့စိတ်ကလည်းပေါ်လာတယ်။ ကောက်ရိုးမျှင် ‘မ’နိုင်သေးတဲ့အရွယ်မလား။

သို့ပေမယ့် ထင်သလောက်တော့ဇာတ်လမ်းကမရိုးရှင်းခဲ့ဘူး။ တစ်ညတာပျော်ပါးရုံကြံခဲ့တဲ့အဘိုးကြီးခမျာ ကိုယ့်မြေးအရွယ် ကလေးမလေးအပေါ်သံယောဇဉ်တွယ်ပြီး ငယ်စဉ်နုပျိုစဉ်ကတည်းက မခံစားခဲ့ရဖူးတဲ့ မေတ္တာတွေယိုဖိတ်ခဲ့ပါတော့တယ်။ ရင့်ကျက်လာတဲ့ အတွေ့အကြုံတွေ အသိပညာတွေနဲ့ဆင်ခြင်ပြီး တဏှာကြောင့်လို့ဆုံးဖြတ်ခဲ့ပေမယ့် မသိစိတ်ထဲကတော့ တဏှာရာဂကင်းတဲ့မေတ္တာလို့ အဘိုးကြီးကို ပြောပြနေခဲ့တယ်။ ငယ်စဉ်ကတည်းက ပေခဲ့တေခဲ့သမျှ ပျော်ခဲ့ပါးခဲ့သမျှ သူနဲ့ဆက်ဆံမှုရှိခဲ့သမျှ အမျိုးသမီးတွေနဲ့ချိန်ထိုးစဉ်းစားပြီး ဒီကလေးမလေး”ဒဲလ်ဂါးဒီးနား”နဲ့တွေ့တော့မှ တဏှာနဲ့မေတ္တာကို ခွဲခွဲခြားခြားသိလာရတဲ့ သူ့အဖြစ်ကိုလည်း သူကိုယ်တိုင် လက်မခံနိုင်အောင်ဖြစ်နေမိတယ်။အဘိုးကြီးရဲ့နောင်တမကင်းတဲ့စကားရှိပါတယ်။

“အချစ်မရနိုင်တဲ့ သူတွေအတွက်တော့ လိင်ကိစ္စက ဖြေသိမ့်စရာပေါ့"တဲ့။

ကောင်မလေးကို ကာမအရမယူခဲ့ဘဲ အိပ်ရာဘေးမှာထိုင် စိတ်ကူးတွေယဉ်ပြီးစာတွေဖတ်ပြ အနုပညာတွေမိတ်ဆက်ပြီးညတိုင်း အချစ်ရူးနေခဲ့တဲ့ ထူးဆန်းတဲ့အသက်ကိုးဆယ်အရွယ် အဘိုးအိုတစ်ဦး။တဏှာရာဂဆိုတာ ဆားငန်ရည်လိုငတ်မပြေနိုင်မှန်း၊ ဖြူစင်တဲ့အချစ်နဲ့ မေတ္တာက ဘဝအတွက်ရှင်သန်ဖို့ခွန်အားတွေပေးနိုင်မှန်း ဒီအသက်အရွယ်ရောက်မှ သိလာ၊ သဘောပေါက်လာတယ်။အချစ်က အရာရာကိုပြောင်းလဲစေနိုင်တယ်၊အတားအဆီးအဟန့်အတား အကန့်အသတ်တွေကို ချိုးဖျက်နိုင်တယ်ပေါ့လေ။ဒီအချက်ကို မြေးအဘိုးအရွယ်ဖြစ်နေတဲ့ လူနှစ်ယောက်နဲ့တင်ပြထားပုံကတော့ ဝေဖန်သူတွေဆိုခဲ့သည့်အတိုင်း စိတ်မသက်မသာဖြစ်ရပါတယ်။

မရဏနားနီးနေတဲ့အနေအထားကို စိတ်ပျက်ပျက်နဲ့ညည်းတွားနေသံလည်းကြားရမယ်။အိမ်ခေါင်မိုးပေါ်တက်အော်တယ်လို့တင်စားထားတဲ့ သတင်းစာရဲ့ တနင်္ဂနွေကော်လံမှာ သူ့အရွယ်ရလာတဲ့ ဘဝအတွေးအမြင်တွေကို ရေးရင်ရေးနေမယ်။ကိုက်ခဲနာကျင်တာတွေကိုညည်းတွားနေမယ်။ငယ်ဘဝက ရွှေရောင်အတိတ်ကာလတွေကိုလည်းနားထောင်ရမယ်။အသက်ကြီးပြီးအထီးကျန်နေတဲ့လူကြီးတစ်ယောက်ကိုအဖော်ပြုပေးရင်း အချစ်မေတ္တာဆန်းကြယ်ပုံကိုလည်း ခံစားရင်းပေါ့။အချစ်စစ်က နောက်ကျမှရောက်လာရင်ရောဆိုပြီး မေးခွန်းထုတ်ထားတဲ့သဘောမျိုးပါ။

ဘဝဆိုတာ ‘ဟီရာကလေးတပ်စ်' ရဲ့ အမြဲ စီးဆင်းနေတဲ့ မြစ်တစ်စင်းလို ဖြတ်စီးသွားတာမျိုး မဟုတ်ဘဲ တစ်ဖက်ကို မီးကင် လို့ ကျက်သွားရင် နောက်ထပ် အနှစ်ကိုးဆယ်စာအတွက် အခြားတစ်ဖက် လှန်ပြီး မီးကင်ရမယ့် တစ်မူထူးခြားတဲ့ အခွင့်အလမ်း တစ်ခုလို့ ယူဆလာတယ်။

- အပျော်မယ်များသို့ အရွယ်ကျော်တမ်းချင်း, p. 106

စာအုပ်ထဲမှာပါတဲ့ သုံးသပ်ချက်ထဲက စာသားကိုယူပြီးပြောရရင်တော့ ဒီဝတ္ထုဟာ ‘အိုမင်းချိန်ရဲ့ ကံဆိုးမိုးမှောင်ကျမှုနဲ့ ချစ်မေတ္တာရဲ့ သုခတို့ကို စိတ်လှုပ်ရှားဖွယ်ရာ ခံစား’ရမယ့်ဝတ္ထုလို့ဆိုချင်ပါတယ်ခင်ဗျာ။အဘိုးကြီးက သူ့ဘဝအဓိပ္ပာယ်ကို နောက်ဆုံးမှာရှာတွေ့ပြီးလက်ခံနားလည်သွားပါတော့တယ်။

‘ဒဲလ်ဂါးဒီးနားရေ.. မင်း အခု သိပြီမဟုတ်လား။ ကျော်ကြားမှုဆိုတာ အဝလွန် မိန်းမကြီးတစ်ယောက်လိုပဲ။ သူက မင်းနဲ့အတူ အိပ်မနေပေမဲ့ မင်း နိုးလာတဲ့အခါ ခုတင်ခြေရင်းမှာ မင်းကို ကြည့်နေတဲ့ သူ့ကို အမြဲတွေ့ရလိမ့်မယ်။’

- အပျော်မယ်များသို့ အရွယ်ကျော်တမ်းချင်း, p. 69

Reading & reviewing! Join me. ?
https://www.facebook.com/share/18c6Noq96b/?mibextid=wwXIfr

#Youths_book_reflections
#လူချို
#အပျော်မယ်များသို့အရွယ်ကျော်တမ်းချင်း
#ဘာသာပြန် #bookreview