Tainlwhar
စာတစ်ပုဒ်ကိုဖန်တီးဖို့ဆိုတာဟာ ထင်ထားသလောက် လွယ်ကူတဲ့အရာမဟုတ်ပါဘူး။ စာရေးဖို့အတွက် အကြောင်းအရာတစ်ခုရှာရ၊ ဖွဲ့နွဲ့ရေးဖို့စာစီရနဲ့ ဒီစာကိုဖတ်တဲ့သူတွေနားလည်နိုင်ဖို့ ကိုယ်ပြောချင်တဲ့အကြောင်းအရာကိုပေါ်လွင်အောင် သေချာလေးစမ်းစစ်ပြီးမှရေးရပါတယ်။ ဒီလိုပဲ အရေးအဖွဲ့မှာလည်း သူ့နည်းနဲ့သူရေးမှ လွယ်ကူရှင်းလင်းပြီး ကျစ်လျစ်တဲ့စာဆောင်ကိုဖန်တီးနိုင်ပါလိမ့်မယ်။ ဒါကြောင့် ကလောင်ကိုင်တို့အနေနဲ့မဖြစ်မနေသိထားသင့်တဲ့ စာရေးနည်း(၄)နည်းအကြောင်းကို ပြောပြပေးချင်ပါတယ်။
(၁) သရုပ်ဖော်ရေးဖွဲ့နည်း
သရုပ်ဖော်ရေးဖွဲ့နည်းဟာ ပတ်ဝန်းကျင်သဘာဝမြင်ကွင်း၊ သက်ရှိသက်မဲ့တို့ရဲ့ပုံပန်းသွင်ပြင်၊ စရိုက်လက္ခဏာတွေကို စာဖတ်သူရဲ့မျက်လုံးအာရုံမှာပေါ်လာအောင် ရေးဖွဲ့ရတဲ့နည်းလမ်းပဲဖြစ်ပါတယ်။ ဥပမာ - အုံ့မှိုင်းဆဲမိုးသောက်ယံအချိန်တွင် တောတွင်းတစ်ခုလုံး မြူခိုးမှုန်တို့ဖြင့်ပြည့်နှက်နေပြီး ကျေးငှက်သာတကာတို့၏ သာယာစွာတွန်ငြီးသံတို့ကိုလည်း ကြားရ၏။
(၂) ဖြစ်စဥ်ပြရေးနည်း
ဒီရေးနည်းကတော့ အကြောင်းအရာတစ်ခုရဲ့ဖြစ်စဉ်တစ်ခုချင်းကို အချိန်ကာလရွေ့လျားမှုအတိုင်းဖြစ်စေ အဆင့်ဆင့်ဖော်ကျူးရေးဖွဲ့ခြင်းမျိုးဖြစ်တယ်။ ဥပမာ - မောင်မောင်သည် မနက်(၈)နာရီတွင်အိပ်ရာထပြီး ရေမိုးချိုးကာ အလုပ်သွားဖို့ပြင်ဆင်လေတော့သည်။
(၃) ကျိုးကြောင်းပြရေးနည်း
ကျိုးကြောင်းပြရေးနည်းဆိုတာ အကြောင်းအရာတစ်ခုရဲ့ အကောင်းအဆိုး၊ အကျိုးအပြစ်တွေပေါ်လွင်စေပြီး ကိုယ့်ရဲ့ဆိုလိုချက်ကို သူတစ်ပါးယုံကြည်လက်ခံလာအောင်ရေးဖွဲ့ခြင်းပဲဖြစ်တယ်။ ဥပမာ - လေ့ကျင့်ခန်းပုံမှန်လုပ်ခြင်းအားဖြင့် ခန္ဓာကိုယ်ကိုလှပစေရုံသာမက ကျန်းမာရေးလည်းညီညွတ်စေသည်။
(၄) ဖွင့်ဆိုရှင်းပြရေးနည်း
ဖွင့်ဆိုရှင်းပြရေးနည်းဆိုတာ အဆိုဝါကျ (အဓိကအကြောင်းအရာ)ရဲ့ မှားခြင်း၊ မှန်ခြင်းတွေကိုနားလည်သဘောပေါက်အောင် အကျယ်တဝင့်ရှင်းပြရေးသားရတဲ့နည်းလမ်းပဲဖြစ်ပါတယ်။ ဥပမာ - အောင်မြင်ချင်သူတိုင်း စာဖတ်သင့်သည်။ မြန်မာလူမျိုးမှန်လျှင် ကိုယ့်ပြည်ကိုချစ်မြတ်နိုးပြီး တိုင်းပြည်တိုးတက်ရေးအတွက် တစ်ဖက်တစ်လှမ်းမှကူညီပါဝင်သင့်သည်။
ဒီရေးနည်းလေးက အပေါ်ကကျိုးကြောင်းပြရေးနည်းနဲ့ခပ်ဆင်ဆင်မလို့ အများစုမှားလေ့ရှိတတ်ကြပါတယ်။
အဆုံးထိဖတ်ပေးကြတဲ့အတွက် ကျေးဇူးအထူးတင်ရှိပါတယ်ရှင့်...?
#Tainlwhar
Keep Reading