Nicolette
ဂျာမန်တွေဟာ ကမ္ဘာ့စစ်နှစ်ခုစလုံးမှာ ပြဿနာကောင်တွေ ဖြစ်ခဲ့ကြပါတယ်။
ကမ္ဘာစစ်အကြောင်းရေးသားထားတဲ့ စာအုပ်တွေနဲ့ ရိုက်ကူးထားတဲ့ ရုပ်ရှင်တွေကို ကြည့်လိုက်ရင်
ဂျာမန်တွေရဲ့ ကောင်းကြောင်းရှာတွေ့မှာမဟုတ်ဘဲ သူတို့ရဲ့ ရက်စက် ယုတ်မာမှုတွေကိုသာ ရှာတွေ့မှာပါ။
သို့ပေမယ့်လဲ စစ်ပွဲတွေကို ဂျာမန်ပြည်သူပြည်သားတွေလဲ သဘောကျလှတယ်လို့ မဟုတ်ပါဘူး။
သူတို့ခမျာလဲ ဒုက္ခမျိုးစုံခံစားပြီး ကမ္ဘာစစ်တွေကို ဖြတ်ကျော်လာခဲ့ရတာပါ။
All Quiet on the Western Front စာအုပ်ကတော့ ဂျာမန်လူမျိုး စာရေးဆရာရေးသားထားတဲ့ စစ်ဆန့်ကျင်ရေး ဝတ္ထုဖြစ်ပြီး 1928 ခုနှစ်မှာ ထုတ်ဝေခဲ့ပါတယ်။
ဒီစာအုပ်ကို ဖတ်လိုက်တာနဲ့ ပထမကမ္ဘာစစ်ထဲက ဂျာမန်စစ်သားငယ်လေးတွေရဲ့ ဘဝထဲ စာဖတ်သူကို ဆွဲခေါ်သွားမှာပါ။
ဆယ်ကျော်သက် ဂျာမန်လူငယ်လေး ပေါလ် ဘာမား (Paul Bäumer) ဟာ သူ့ရဲ့ကျောင်းတက်ဖော် သူငယ်ချင်းတွေနဲ့ အတူတူ စစ်မှုထမ်းဖို့ ပျော်ပျော်ကြီး စာရင်းပေးခဲ့ပါတယ်။
လူငယ်ပီပီ သူရဲကောင်းလုပ်ချင်စိတ်၊ တိုင်းပြည်ချစ်စိတ် နဲ့ ဂျာမန်စစ်တပ်ကို အထင်ကြီးလေးစားစိတ်အပြည့်နဲ့
တပ်ထဲဝင်လာခဲ့ပေမယ့်လဲ တကယ့်ရှေ့တန်း စစ်ပွဲရောက်တဲ့အခါမှာ သူတို့ရဲ့ ယူဆချက်တွေ လွဲမှားကုန်ပါတော့တယ်။
သူရဲကောင်းဖြစ်ဖို့နေနေသာသာ ခေါင်းပေါ်မှာ ဝဲပျံနေတဲ့ ကျဉ်ဆံတွေနဲ့ အမြောက်ဆံတွေကြားထဲ စိတ်မလွတ်သွားအောင်
ညစ်ပတ်ပြီး ကြွက်တွေပေါက်ဖွားနေတဲ့ ကတုတ်ကျင်းကြီးထဲမှာ ရူးမသွားအောင် အနိုင်နိုင်ထိန်းထားရတယ်။
သူငယ်ချင်းတွေ တစ်ယောက်ပြီး တစ်ယောက် ရက်ရက်စက်စက်သေဆုံးသွားတာကို ဘာမှမတတ်နိုင်ဘဲ လက်လျော့ကြည့်နေခဲ့ရတယ်။
အငတ်ဘေး နဲ့ ရောဂါဘေးတွေကို ကြုံတွေ့ခဲ့ရပြီး စစ်ရဲ့ ရုပ်ဆိုးအကျဉ်းတန်မှုတွေကို မျက်ဝါးထင်ထင်မြင်တွေ့ရတဲ့အခါမှာ
ပေါလ် တစ်ယောက် အိမ်ပြန်ချင်တာကလွဲပြီး ဘာကိုမှ စဉ်းစားလို့မရတော့ပါဘူး။
လေးနှစ်လုံးလုံးရှေ့တန်းမှာ တိုက်ခိုက်ခဲ့ရတဲ့ ပေါလ် စစ်ကြီးပြီးခါနီး နောက်ဆုံးမိနစ်ပိုင်းအလိုလောက်မှာ သူ့အသက်ကို အလဟသဆုံးရှုံးခဲ့ရပါတယ်။
သူ့လိုပဲ နောက်ဆုံးမိနစ်ရောက်မှ သေရသူတွေ အများကြီးပါ။
စစ်ပွဲတွေကြားမှာ ပျက်စီးခဲ့ရတဲ့ လူတွေရဲ့အသက်အိုးအိမ်စည်းစိမ်တွေဟာ ဘာအတွက် ပျက်စီးခဲ့ရတာလဲ။
စစ်ဖြစ်ရတာ တန်ရော တန်ရဲ့လား။ စစ်ဖြစ်ပြီး ဘာတွေပြန်ရမလဲဆိုတာ ဒီစာအုပ်ကို ဖတ်ပြီး အကြိမ်ကြိမ်တွေးမိမှာပါ။
စာရေးဆရာ Erich Maria Remarque (အဲရစ် မာရီယာ ရီမတ်) ကိုယ်တိုင်က ပထမကမ္ဘာစစ်မှာ တာဝန်ထမ်းဆောင်ခဲ့တဲ့ ဆယ်ကျော်သက်စစ်သားတစ်ယောက်ဖြစ်တာကြောင့်
စာအုပ်ထဲမှာပါတဲ့ အကြောင်းအရာတွေက သူ့အတွေ့အကြုံအစစ်အမှန်တွေပါပဲ။
"He fell in October 1918, on a day that was so quiet and still on the whole front, that the army report confined itself to the single sentence: All quiet on the Western Front."
ဒုတိယကမ္ဘာစစ်ဖြစ်နေစဉ်အတွင်းမှာတော့ ဒီဝတ္ထုဟာ စစ်တိုက်မယ့်သူတွေအတွက် အကြောက်တရားတွေ ပေးနိုင်တယ်ဆိုပြီး ပိတ်ပင်ခံရဖူးပါတယ်။
All Quiet on the Western Front စာအုပ် ကို အမေရိကန်ကနေ 1930 မှာ ရုပ်ရှင်တစ်ကား ရိုက်ကူးခဲ့ပါတယ်။ အကယ်ဒမီနှစ်ခု ရခဲ့ပါတယ်။
1979 မှာလဲ အမေရိကန်နဲ့ ဗြိတိန်ပေါင်းပြီး ရုပ်ရှင်တစ်ကား ရိုက်ခဲ့ပြန်ပါတယ်။ Golden Globe Award နဲ့ Emmy Award နှစ်ခုရပြန်ပါတယ်။
ဒီနှစ်ကားလုံးက English စကားပြော ရုပ်ရှင်တွေပါ။
ဂျာမဏီက 2022 မှာ ဂျာမန်ရုပ်ရှင်ပညာရှင်တွေရိုက်ကူးတဲ့ ဂျာမန်စကားပြော All Quiet on the Western Front ကိုဖန်တီးခဲ့ပါတယ်။ အော်စကာဆု လေးခု ရရှိခဲ့ပြီး တခြားဆုတွေလဲ ရရှိခဲ့ပါတယ်။
ဇာတ်ကားသုံးကားလုံးကြည့်ဖူးပေမယ့် ကျွန်မအကြိုက်ဆုံးကတော့ ဂျာမဏီက 2022 မှာရိုက်တဲ့ကားပါ။
ဂျာမာန်တွေရဲ့ ခံစားချက်ကို ဂျာမန်တွေရိုက်တာ ပိုပီပြင်တယ်လို့ ခံစားမိလို့ပါ။
Paul နေရာကနေ သရုပ်ဆောင်တဲ့ မင်းသား Felix က ဒီရုပ်ရှင်ဟာ သူ့အတွက် ပွဲဦးထွက် ပထမဆုံးရုပ်ရှင်ဖြစ်ပေမယ့်လဲ
ဆယ်ကျော်သက်တစ်ယောက်ရဲ့ ခံစားချက်မျိုးစုံကို ပေါ်လွင်အောင် အကောင်းဆုံး သရုပ်ဆောင်သွားနိုင်တယ်လို့ထင်ပါတယ်။
ဒီစာအုပ်ကို ဂျာမန်ဘာသာကနေ အင်္ဂလိပ်ဘာသာ ပြန်ထားတဲ့ စာအုပ်တွေ အများကြီးရှိပေမယ့်လဲ A. W. WHEEN FAWCETT CREST ဘာသာပြန်ထားတာက ဖတ်ရတာပို အဆင်ပြေတယ်လို့ နာမည်ကြီးပါတယ်။
All Quiet on the Western Front စာအုပ်ရဲ့ English Version ကို အောက်ပါ Telegram Channel မှာ တင်ပေးထားပါတယ် ✌?
https://t.me/+fDx3Hhe9OWoyZmY1
ဖတ်သင့်တဲ့ English စာအုပ်ကောင်းလေးတွေ၊ learning tips တွေ နဲ့ ဘာသာပြန်ဝတ္ထုတွေကို ရေးသားသွားဦးမှာဖြစ်လို့ အကောင့်လေးကို follow လုပ်သွားကြပါဦးနော် ?
Keep Reading