နွယ်ငြိမ်းလင်းပွင့်
တုန်ခါမှု အတိုင်းအတာ
တည်ဆောက်ဖို့က ခက်ခဲပြီး ပြိုကျ ပျက်စီးသွားဖို့က အလွယ်လေးပါ။ တည်ဆောက် ဖန်တီး ရုပ်လုံးပေါ်လာဖို့ လချီ၊ နှစ်ချီ၊ သမိုင်းအဆက်ဆက်ချီ ကြာကောင်းကြာနိုင်ပေမယ့် ပျက်စီး ကြွေကျ မြေမှုန်ဖြစ်သွားဖို့က စက္ကန့်ပိုင်း၊ မိနစ်ပိုင်းလေးပါပဲ။ (၂၀၂၅) ခုနှစ်၊ မတ်လ (၂၈) ရက်၊ သောကြာနေ့မှာ စစ်ကိုင်းငလျင်ပြတ်ရွေ့ကြောဟာ မန္တလေးမြို့၊ စစ်ကိုင်းမြို့တို့အပါအဝင် မြန်မာနိုင်ငံအလယ်ပိုင်းရှိ မြို့များကို အကြီးအကျယ် တုန်လှုပ်စေခဲ့ပါတယ်။
(၇.၇) ရစ်ချက်စတာစကေး ရှိသော ဖျက်အားပြင်း ငလျင်ကြီး လှုပ်ခတ်ပြီး ဒုတိယမြောက်နေ့ ....
မြေကြီးပေါ် ကျွံဝင်သွားတဲ့ အထပ်လွှာများ၊ အပုံသား လဲကျနေတဲ့ အထပ်မြင့် အဆောက်အအုံများ၊ ယိုင်စောင်းသွားသော တိုက်အိမ်များ၊ ပြိုကျလာသော အုတ်ပုံခဲများကြောင့် ရှေ့ခြမ်း၊ ဘေးခြမ်း၊ နောက်ခြမ်း၊ တစ်ခုလုံး ပိန့်ရှုံ့သွားတဲ့ ကားကြီး၊ ကားလေးများဟာ ငလျင်ဒဏ်သင့် မန္တလေးမြို့ထဲ ရပ်ကွက်များရဲ့ မြင်ကွင်းများ ဖြစ်တယ်။ ဓါတ်တိုင်အချို့လည်း ယိုင်လဲသွားပြီး ဓါတ်ကြိုးများ တိုးလို့တွဲလောင်း ဖြစ်နေတဲ့ လမ်းဆုံ မီးပွိုင့်များကိုလည်း တွေ့မြင်နိုင်တယ်။
မန္တလေးမြို့အနှံ့ လမ်းပေါ်မှာ မြို့သူ၊ မြို့သားများ ဥဒဟို သွားလာနေကြတယ်။ ခွေးဘီလူးကား၊ လိုက်ထရပ်ကား နောက်ခန်းများမှာ ကျောပိုးအိတ်များ၊ ခရီးဆောင်အိတ်များ၊ ဖျာများ၊ ခြင်ထောင်များ၊ ခြင်းတောင်းများ တင်ကာ သူတို့ ရည်မှန်းရာ နေရာတစ်ခုဆီ သွားနေကြတယ်။ မီနီအိုးဝေများပေါ်တွင်လည်း ကလေးပုစုခရုများအပါအဝင် သက်ကြီးရွယ်အိုများအားလုံး အထုပ်ကိုယ်စီ သယ်ဆောင်ထားကာ ရေကြည်ရာ မြက်နုရာ ပြောင်းရွှေ့နေကြတယ်။ ဆိုင်ကယ်များဖြင့်လည်း မိသားစုများ အစုစု သွားလာနေကြတယ်။ အားလုံးဟာ ပုရွက်ဆိတ်များ၊ ပျားများကဲ့သို့ တရွေ့ရွေ့၊ တဝီးဝီး လှုပ်ရှားနေကြပေတယ်။
(၁၉) လမ်း ကျုံးဘက်မှာ လမ်းလယ်ကျွန်းပေါ်တွင်ရော၊ ကျုံးဘေး ပလက်ဖောင်းတွင်ပါ မိသားစုများစွာ အလျှိုလျှို နေရာယူထားကြတယ်။ ဖျာခင်း၊ ခြင်ထောင်များ ထောင်ထားကြတယ်။ သူ့အစုနဲ့သူ၊ သူ့မိသားစုနဲ့ သူ။ ကလေးသူငယ်များကတော့ ပျော်ပွဲစား ထွက်လာသည်ဟု အမှတ်မှားပြီး ပျော်ရွှင် ရယ်မောနေကြသလား မပြောတတ်။ သူတို့လေးတွေ ပျော်ရွှင်နေကြတယ်။ လူကြီးမိဘများကတော့ မှိုင်တွေ ငေးမောနေကြတယ်။ ငလျင်ဒဏ်ကြောင့် အိုးမဲ့ အိမ်မဲ့ ဖြစ်သွားရသူများ မန္တလေးမြို့ပေါ်တွင် အများအပြား ရှိနေတယ်။
ဖျက်အားပြင်း ဇောက်တိမ်ငလျင် (၂) ခု လှုပ်ခတ်ပြီး နောက်ပိုင်း ပြင်းအားအမျိုးမျိုးရှိတဲ့ ငလျင်အသေးစားများ မန္တလေးမြို့မှာ တောက်လျှောက်လှုပ်နေခဲ့တယ်။ ကျုံးဘေး လူစည်ကားရာတွင် "ဒုတ် ဒုတ်" ဆိုပြီး ငလျင်တစ်ချက် လှုပ်သွားတယ်။ ထို "ဒုတ်၊ ဒုတ်" အလှုပ်တွင် လူကြီးပိုင်းများက တုန်တက်သွားပြီး "ငလျင်လှုပ်တယ်ဟေ့" ဆိုကာ ရုတ်တရက် ထိုင်ချလိုက်ကြတယ်။ မြေပြင်ကျယ်မှာ ဖြစ်နေပါလျက် သူတို့ကို အကဲပိုရကောင်းလားလို့ အပြစ်မမြင်ချင်ပါနဲ့နော်။ သူတို့ဟာ ငလျင်ရိုက်ချက်ကို အရှိုးရာထင်အောင် ခံခဲ့ရသူများ ဖြစ်တယ်။
ဆိုက်ဝါးလား၊ ဂျင်းလား၊ ထွင်လုံးလားတော့ မသိ။ ည (၁၂) ကျော်ရင် အနီရောင်အဆင့်ရှိတဲ့ ငလျင်လှုပ်မယ်ဆိုလို့ အိမ်တိုင်းရှိ ကားများကို လမ်းလယ်ချရပ်ထားရတယ်။ ရပ်ကွက်ရှိ လူအကုန်၊ တစ်နည်း မန္တလေးမြို့ရှိ လူများအားလုံး ညကြီးအချိန်မတော် လမ်းပေါ်ရောက်ပြီး လာလတ္တံ့သော ငလျင်ဘေးမှ ကြိုတင် အကာအကွယ်ယူထားကြတယ်။ ကားနောက်ခန်းများတွင် ခြင်ထောင်များ ထောင်ကာ အိပ်စက်နေကြတဲ့ ကလေးငယ်များ၊ လူငယ်များ၊ စကားဝိုင်းဖွဲ့ ပြောဆိုနေကြတဲ့ လူကြီးမိဘများ၊ အသင့်အနေအထား နေနေကြတဲ့ မီးသတ်ကားများ၊ တပွမ်ပွမ်မြည်ပြီး ရံဖန်ရံခါ ဖြတ်သန်းသွားတဲ့ လူနာတင်ယာဥ်နှင့် မီးသတ်ကားများဟာ ငလျင်ဒဏ် ဖိစီးသော ညတစ်ည၏ ဇာတ်ကောင်များအဖြစ် သက်ဝင် လှုပ်ရှားနေကြတယ်။
"ဝေါ ဝေါ ဝေါ" လေတိုးသံ အကျယ်ကြီးကဲ့သို့ ငလျင်ရှေ့ပြေး တော်လည်းသံကြားပြီး (၁၀) စက္ကန့်ပိုင်းအတွင်းလောက်မှာပင် ဘယ်ညာ ယိမ်းယိုင်စေတဲ့ တုန်ခါမှုကြီး အစပြုလာတယ်။ တစ်မိနစ်ခန့် ဆက်တိုက် တုန်ခါ မြည် ဟည်းပြီးနောက် ရပ်တန့်သွားတယ်။ လူများ လမ်းပေါ်သို့ ကျွံကျ ရောက်ရှိလာတယ်။ ပထမအကြိမ် ဖျက်အားပြင်း ငလျင်ကြောင့် ယိမ်းယိုင် တိမ်းစောင်းနေတဲ့ အဆောက်အအုံများဟာ ဒုတိယအကြိမ် ငလျင်အလှုပ်မှာ နွေကာလ၌ တဖြုတ်ဖြုတ်ကြွေသော ရွက်ဟောင်းအိုများကဲ့သို့ တစ်စစီ ပြိုကျ ပျက်စီးခဲ့တယ်။
(၆.၄) ရစ်ချက်စတာစကေးရှိတဲ့ ဒုတိယအကြိမ် ငလျင်လှုပ်ခတ်မှု မဖြစ်ပွားခင် (၁၂) မိနစ်သည် သေခြင်းနှင့် ရှင်ခြင်းကို ပိုင်းခြားပေးလိုက်တဲ့ ရွှေမိနစ်များ ဖြစ်ခဲ့တယ်။ ရတတ်သမျှသော အပေါက်များမှ တွန်းထိုး ရုန်းကန်ထွက်နေကြတဲ့ လူများအတွက် (၁၂) မိနစ်ဟာ အလွန်တိုတောင်းသော ကာလငယ်လေး ဖြစ်ခဲ့ပေလိမ့်မယ်။ ကြိုးစားမှု ရလဒ် အရာမထင်ဘဲ အဆောက်အအုံ အပြိုအပျက်များနှင့်အတူ ရှင်သန်ခြင်း သက်တမ်းစေ့သွားသော လူများကို ငလျင်က ဝါးမြိုသွားခဲ့တယ်။ ယခု ငလျင်လှုပ်ပြီး တတိယမြောက်နေ့အထိ ငလျင်ဒဏ်ကြောင့် မန္တလေးမြို့ရှိ သေ ဆုံးသူအရေအတွက်မှာ တစ်ထောင်ကျော်နေပေပြီ။
မြေကြီးထဲ ကျွံဝင်သွားသော အထပ်လွှာများထဲ ပိတ်မိနေသူများလည်း ကျန်ရှိနေသေးတယ်လို့ တစ်ဆင့်စကား တစ်ဆင့်နားဖြင့် ကြားသိရသကဲ့သို့ သတင်းများမှလည်း သိရှိရတယ်။ အော်ဟစ် အကူအညီတောင်းနေသံကို ကြားရသော်လည်း အဆောက်အအုံ အပြိုအပျက်ထဲသို့ ဝင်ပေါက် ရှာမတွေ့သဖြင့် လက်လျှော့ထားရတယ်လို့လည်း စိတ်မချမ်းမြေ့စွာ ကြားသိရပြန်တယ်။ ပြိုကျလတ္တံ့သော အဆောက်အအုံများ၏ မျက်နှာရိပ် မျက်နှာကဲကို ကြည့်ပြီး သတိ၊ ဝီရိယထားကာ နေနေကြတဲ့ အိမ်ထောင်စုများဟာလည်း ပလက်ဖောင်း ဝဲယာတွင် စတည်းချနေနေကြရတယ်။
"ဟိုရှေ့က ဆူဆူညံ၊ ဘာသံလဲ မေး" ဆိုသလို ရှေ့တစ်ပြမှာ လူတွေ စုရုံး စုရုံးနဲ့ တန်းစီနေကြတယ်။ သစ်သီးပွဲရုံ တစ်ခုက လိုက်ထရပ်ကားအပြည့် သစ်သီးခြင်းများ သယ်ဆောင်လာကာ သစ်သီးများကို ဝေငှပေးနေတယ်။ နောက်တစ်နေရာတွင် မုန့်တိုက်တစ်ခုကလည်း မုန့်ပဲသရေစာနှင့် ရေသန့်ဘူးများကို တစ်ဦးစီ အချိုးကျ ပေးနေကြတယ်။ မြောက်ပြင်ဘက် ကျုံးဘေးတစ်နေရာတွင်လည်း အန်တီကြီး တစ်ယောက်သည် ငွေစက္ကူအထပ်လိုက် ကိုင်ဆောင်ထားကာ အနီးရှိ အိမ်ရာ ရွှေ့ပြောင်းခံထိသူများကို ပိုက်ဆံများ ပေးလှူနေတယ်။ "ကျေးဇူးတင်ပါတယ်ခင်ဗျာ၊ ကျေးဇူးတင်ပါတယ်ရှင်" ဆိုကာ ငလျင်ဒဏ်အထိဆုံး မန္တလေးသူ၊ မန္တလေးသားများသည် ပြုံးပျော် ပီတိဖြစ်နေကြတယ်။
ကျုံးတစ်ဝိုက်မှာ သပြေဘူတ ပန်းဝါတို့ အခိုင်လိုက်၊ အဆုပ်လိုက် ပွင့်နေတယ်။ ဒီလို နွေဦးပေါက်ရာသီမှာ သပြေဘူတ ပန်းပွင့်ဝါဝါထိန်များသည် မန္တလေးမြို့ရဲ့ အလှတစ်ပါး ဖြစ်ခဲ့တယ်။ ပန်းဝါတို့က သစ္စာရှိစွာ ဝါထိန်တောက်နေသော်လည်း အလှတရားကို ခံစား တန်ဖိုးထားသူတို့ခမျာ ဒုက္ခပင်လယ်ဝေနေကြတယ်။ အလှဓါတ်ပုံများ ရိုက် ကူးခြင်းခံရလေ့ရှိသော သပြေဘူတတို့ ဒီနှစ် မန္တလေး နွေဦးမှာတော့ အထီးကျန်နေရော့မယ်။ ပန်းဝါဝါတို့က မန္တလေးသူ၊ မန္တလေးသားတို့ရဲ့ အဆိုးလောကဓံ ကြုံတွေ့ရခြင်းကို ဖြေလျှော့ပေးနိုင်လေမလား။ နွေနေပူပူကို တော်လှန်ကာ ပန်းပွင့်ဝါဝါတို့ မွေးထုတ်ပေးနိုင်စွမ်းသော ရဲရဲတောက် သပြေဘူတ အပင်များဟာ မန္တလေးသူ၊ မန္တလေးသားများအတွက် တစ်စုံတရာသော စိတ်ခွန်အားပေးစွမ်းနိုင်လေမလား။
3.4.25 (Thu)
Keep Reading