သူ့ဆံပင်နှင်းဆီပွင့်တွေနှင့်-မင်းလူ✍️

“ကျွန်တော်ရယ်တာ ဌာန်ကရိုဏ်း မကျဘူးဟု ထင်နေမိ၏။ ကျွန်တော်သည် ဟက်ဟက်ပက်ပက် ရယ်မောခြင်းကို မေ့နေပြီလော၊ မရယ်တတ်တော့ပြီလော။ရယ်ခြင်းကိုပင် ပြန်လည်၍ လေ့ကျင့်ရဦးအံ့ ထင်သည်။”

~Pg-23

စာအုပ်နာမည်မြင်တော့ မဖတ်ရသေးခင် ဆရာကြီး မင်းသုဝဏ်ရဲ့ ‘နှင်းဆီပွင့်’ကဗျာထဲကလို အဖြစ်မျိုးလားဆိုပြီး judgeလုပ်ခဲ့မိတယ်။သို့သော်လည်း “Don’t judge a book by its cover” ဆိုသလိုပေါ့။

ဆယ်ကျော်သက်အချစ်ဇာတ်လမ်းလေးကို အစမှာ ထောင်ကလွတ်တာနဲ့စထားတာပါ။ဘာကြောင့် ထောင်ကျရတယ်ဆိုတာကို ကျနော်အဖတ်မမှားရင် ထည့်မဖော်ပြထားဘူးထင်ပါတယ်။ အဆီးအတားမရှိတဲ့ မြေပေါ်ကို စနင်းရတဲ့ ငယ်ရွယ်နုပျိုမှုတွေ စတေးခဲ့ရတဲ့ လူငယ်လေးရဲ့ ခံစားချက်။’ထောင်’ဆိုရင် ခြင်ထောင်နဲ့တောင်မအိပ်ချင်ဘူးတဲ့။နုပျိုသန်မာမှုတွေကိုရိုက်ချိုးပစ်ခံခဲ့ရပုံများ…

နိုင်ရာစားလောကကြီးမှာ ခွန်အားကြီးတဲ့သူက နိုင်တယ်။ကြက်တောင်ရိုက်ပွဲမှာ ဖြစ်ပျက်သွားတာကို ဖတ်ရတော့ တက်သစ်စ အခွင့်ထူးခံလေးနဲ့ အထက်ဖားအောက်ဖိတို့နှစ်ယောက် ခံလိုက်ရပုံကို မျက်စိထဲမြင်လာတယ်။

ဒါ့အပြင် ချစ်သူနှစ်ယောက်ကြားက ပဋိပက္ခလေးတွေကိုဖတ်ရတော့ ရေရှည်တွဲ မြဲစေဖို့ရာအတွက် အရိုးခံမေတ္တာနဲ့မလုံလောက်ဘဲ ထောင့်စုံအောင် တွက်ချက်ရတယ်။အရွယ်ကွာဟချက်၊ပညာကွာခြားချက်၊ပန်းတိုင်ကွာခြားချက် ၊မပွင့်လင်းတဲ့ဆက်ဆံရေး စသည်စသည် ကွဲပြားမှုလေးတွေက မသိမသာဖြစ်စေသိသိသာသာဖြစ်စေသူတို့ကြားမှာ အက်ကြောင်းရာတွေထင်စေခဲ့တယ်။

ကလေးအရွယ် နဲ့ လူလတ်ပိုင်းအရွယ် စပ်ကူးမပ်ကူးကာလမှာ ဆက်ဆံပုံ အမူအကျင့်တွေ ပြောင်းလဲလာတာကြောင့် ကမောက်ကမအဖြစ်အပျက်လေးတွေကလည်း ဖတ်ရမြူးစေပါတယ်။ဒါတင်မက အာဏာကိုအလွဲသုံးစားလုပ်တဲ့လူတွေ၊အချောင်ရအချောင်စား၊ကြောင်သူတော်တွေ ၊‘ကတညုတ ကတဝေဒီ’တရားမရှိတဲ့ လူတချို့စရိုက်ကိုလည်း ဆရာက အလွတ်မပေးထားပါဘူး။

နားလည်မှုတွေလွဲခဲ့ကြပြီး သံသယတွေကသူတို့နှစ်​ယောက်သံယောဇဉ်ကို ဝေဝါးသွားစေတယ်။အနစ်နာခံခြင်းနဲ့ရက်စက်
ခြင်းနှစ်ခုကို လွဲမှားခေါင်းစဉ်တပ်
လိုက်မိရင်တော့ ပြင်မရတဲ့အမှားဖြစ်သွားမှာပါ။ ဘယ်လိုအကြောင်းတရားတွေကြောင့်ဖြစ်ဖြစ် နှင်းဆီပန်းတစ်ပွင့်ကတော့ သူ့ချစ်သူ ‘ခင်လေးခင်’ရဲ့ခေါင်းထက်မှာ ထာဝရ နေရာယူနေလိမ့်မယ်ဆိုတာ သေချာပါတယ်လေ။

သေချာအကွက်ချပြီးဆုံးဖြတ်တတ်တဲ့ ကောင်မလေး နဲ့ အချစ်ကိုကိုးကွယ်တဲ့ ကောင်လေး တို့ရဲ့ အချစ်ဇာတ်လမ်းလေးက လှည့်ကွက်မျိုးစုံနဲ့ စာဖတ်သူရဲ့ ခံစားမှုရသကို အမိအရ ဖမ်းစားထားနိုင်မယ်လို့ မြင်မိပါတယ်။ရုပ်ရှင်ဇာတ်ကားတစ်ကားကြည့်ရသလို ဝတ္ထုရဲ့ရသအလေးအပေါ့ကို မြည်းကြည့်ကြပါဦးခင်ဗျာ..။

Rating-⭐️⭐️⭐️⭐️

#လမင်းကိုထရံပေါက်မှကြည့်ခြင်း #bookreview #မင်းလူ