တော်စတွိုင်း၏ ပျားရည်စက်လေးများ

လူတစ်ယောက်ဟာ သားရဲတစ်ကောင်လိုက်လို့ထွက်ပြေးရင်း ရေတွင်းထဲကိုပြုတ်ကျသတဲ့
ဒါပေမယ့်အောက်ထိမကျဘဲ ရေတွင်းနံရံမှာပေါက်နေတဲ့ သစ်ကိုင်းတစ်ကိုင်းကိုဆွဲမိထားတယ်တဲ့
အောက်ငုံ့ကြည့်တော့ သူ့ကိုစားဖို့အသင့်စောင့်နေတဲ့ နဂါးတစ်ကောင်က ပါးစပ်ကြီးဟလို့
သူဆွဲထားတဲ့သစ်ကိုင်းကိုလည်း ကြွက်ဖြူနဲ့ကြွက်မဲနှစ်ကောင်က တစ်တိတိနဲ့ ကိုက်ဖြတ်နေသတဲ့
တော်စတွိုင်းကတော့ လူ့ဘဝကိုဒီလို ခိုင်းနှိုင်းခဲ့တယ်
မစန္ဒာက သူ့ဝတ္ထုထဲမှာ သားရဲကြီးဆိုတာ လူ့ဘဝမှာကြုံရတဲ့ သောက ဗျာပါဒ ဒုက္ခတွေကို တော်စတွိုင်းက တင်စားခဲ့ဟန်တူတယ်လို့ ရေးဖူးတယ်
ဒါတွေနဲ့ လုံးချာလည်လိုက်ရင်း နဂါးခံတွင်းဝဆိုတဲ့ သေမင်းဆီကို တစ်နေ့ကျ ရောက်ရမှာပဲပေါ့
ကြွက်ဖြူနဲ့ကြွက်မဲဆိုတာကတော့ လူ့ဘဝကို တရွေ့ရွေ့ကုန်ဆုံးစေတဲ့ နေ့နဲ့ညကို တင်စားထားတယ်တဲ့
စိတ်ပျက်စရာ လူ့ဘဝကြီးပဲပေါ့လေ
ဒါပေမယ့်ဒီလိုအခြေအနေမှာ အဲ့ဒီလူဟာ ငိုယိုမနေဘူးတဲ့
ဘာလုပ်နေလဲဆိုတော့ သစ်ကိုင်းကသစ်ရွက်ကလေးတွေမှာ တင်နေတဲ့ ပျားရည်စက်ကလေးတွေကို လျှာနဲ့လိုက်လျက်နေသတဲ့
တော်စတွိုင်းရဲ့ ဒီပျားရည်စက်ကလေးတွေဟာ ကန္တာရထဲက အိုအေစစ်လေးလို စိတ်ပျက်စရာလောကကြီးထဲဖြတ်သန်းရင်း ကြုံတွေ့ရတဲ့ ချိုမြိန်တဲ့အခိုက်အတန့်လေးတွေကို တင်စားထားတာဖြစ်ပါလိမ့်မယ်

ကိုယ်တွေငယ်ငယ်က အိမ်မှာ မနက်လင်းတာနဲ့မိသားစုဝင်တွေအကုန် တာဝန်ကိုယ်စီ အလုပ်ကိုယ်စီနဲ့မို့ တစ်စုတစ်စည်းထဲ မရှိကြတာများပါတယ်
ကျောင်းပိတ်ရက် မောင်နှမတွေ အိမ်ကပ်တော့လည်း တကူးတကမစုမိကြပါဘူး
ဒါပေမယ့် မိသားစုဝင်တွေအကုန် စုံတဲ့အချိန်လေးကတော့ ညစာထမင်းဝိုင်းလေးပါပဲ
အိမ်မှာက ထမင်းကို စုပြီးပဲစားကြတာများပါတယ်
ဗိုက်ဆာလို့ဆိုပြီး ထမင်းစောစားနှင့်တဲ့သူမရှိ
ထမင်းဝိုင်းဆိုတာ မိသားစုဝင်တိုင်း မဖြစ်မနေတက်ရောက်ကြတဲ့ စုံညီပွဲလေးပါပဲ
အခုအိမ်နဲ့ဝေးတဲ့အချိန်မှ ပြန်တွေးမိတော့ ဒီထမင်းဝိုင်းလေးက ကိုယ်တွေမိသားစုရဲ့ ချိုမြိန်တဲ့အခိုက်အတန့် ပျားရည်စက်ကလေးတွေပေါ့
မိသားစုဝင်တွေရဲ့အပြုံးတွေ အတူထားခဲ့ကြတဲ့နွေးထွေးမှုတွေ ဂရုစိုက်မှုတွေ ချစ်ခြင်းမေတ္တာတွေအကုန်ဟာ အစားထိုးမရတဲ့ ဘဝရဲ့ပျားရည်စက်ကလေးများပါပဲ

ဘေးမှာတော့ ရေပတ်လည်ဝိုင်းနေပါရဲ့
ဘဝမှာ ဖောင်စီးရင်းရေငတ် ဆိုတဲ့အခြေအနေတွေကြုံရလေလေ မိသားစုရဲ့ မေတ္တာရေချိုလေးတွေကို သတိရမိလေလေပါပဲ
သြော် ရေမနစ်ဖို့ကို မနည်းကြိုးစားနေရပါသော်ကော

#အောင်ကျော်စိုး