မပြီးပြတ်တာတွေ ရှင်းထုတ်ပါ

အလုပ်တစ်ခုကို လုပ်ပြီဆိုရင် ဒီအဆင့်တွေကို ဖြတ်သန်းရပါတယ်လို့ဆိုပါတယ်။ အဲ့တာတွေကတော့ ဆုံးဖြတ်ခြင်း (Decide)၊ အစီအစဉ်ချခြင်း (Plan)၊ စတင်လုပ်ခြင်း (Start)၊ ဆက်လုပ်ခြင်း (Continue)၊ အဆုံးသတ်ခြင်း (Finish) နဲ့ ပြီးပြတ်အောင် လုပ်ခြင်း (Complete) တို့ပါ။ အဲဒီအဆင့်တွေကို အစဉ်လိုက်ပြီးစီးအောင် မလုပ်ဘဲနဲ့ အလုပ်တစ်ခုကို အောင်မြင်တဲ့ ရလဒ်ပေါ်ထွက်လာအောင် လုပ်လို့ မရပါဘူးတဲ့။

ကျွန်တော်တို့ထဲမှာရော အလုပ်ကို လက်စသတ် ပြီးပြတ်တဲ့အထိ (Complete) မလုပ်သူ ဘယ်နှစ်ယောက်များ ရှိကြသလဲခင်ဗျာ။ အတော်များများဟာ အလုပ်ကို ဆုံးဖြတ်ချက်ချ (Decide) ပြီး ကျန်တဲ့အဆင့်တွေကို ပြီးအောင် လုပ်ကြပေမယ့် နောက်ဆုံးအဆင့်ဖြစ်တဲ့ ပြီးပြတ်အောင် (Complete) မလုပ်ဘဲနေတတ်ကြပါတယ်။ တစ်ခါတလေ အဲ့ထဲကိုယ်လည်းပါနေတတ်ပါတယ်။

ကိုယ့်ဘဝမှာ ပြီးပြတ်အောင်မလုပ်ခဲ့တဲ့ အလုပ်တွေရှိနေခဲ့သလားဆိုတာကို သေချာလေးစဉ်းစားကြည့်ပါ။ ရှိနေခဲ့တယ်ဆိုရင် အတိတ်က မပြီးပြတ်ခဲ့တဲ့အလုပ်တွေဟာ ခေါင်းထဲမှာ တဝဲလည်လည်ပေါ်နေပါလိမ့်မယ်။ ဒါကြောင့် ပစ္စုပ္ပန်ကာလမှာ ကိုယ်ဟာ စိတ်ရှုပ်ထွေးနေမယ်။ စိတ်ဖိစီးမှုကို ခံစားနေရပါလိမ့်မယ်။

ဒါဆို ဘာကြောင့် အလုပ်ကို ပြီးပြတ်အောင် မလုပ်တာလဲ ❓

တိုတိုနဲ့ လိုရင်းပြောရရင်

၁။ ဘာဆက်လုပ်ရမှန်း မသိလို့

၂။ အလုပ်ဟာ ခက်ခဲလွန်းလို့

၃။ မပြီးပြတ်တဲ့အလုပ်တွေကို ဘယ်လိုကိုင်တွယ်ဖြေရှင်းရမယ်ဆိုတဲ့ အသိဉာဏ်နဲ့ ကျွမ်းကျင်မှုမရှိလို့

၄။ လက်စသတ်ပြီးပြတ်အောင် မလုပ်တတ်တဲ့ အကျင့်ဖြစ်နေလို့ပါပဲ။

ဘယ်အချက်ကြောင့်ပဲဖြစ်ဖြစ် ပြီးပြတ်အောင် လက်စမသတ်ထားတဲ့ အလုပ်တွေစုပုံနေတာဟာ ကျွန်တော်တို့ရဲ့စိတ်ကို ဖိအားပေးလွန်းနေတယ်။ စိတ်ပူပန်စေတယ်။ စိတ်ရှုပ်ထွေးစေတယ်ဆိုတာ အမှန်ပါပဲ။

ဒါကြောင့် အလုပ်ကို ပြီးပြတ်အောင်လုပ်ဖို့ သတိထားပါ ‼️

ကိုယ့်ကိုယ်ကိုယ် ဒီမေးခွန်းကို အမြဲမပြတ်မေးပေးပါ။ ဒီမေးခွန်းဟာ ကျွန်တော်အလုပ်တွေပုံနေတိုင်း မေးနေကြမေးခွန်းဖြစ်ပါတယ်။ မေးခွန်းက“ဒီအလုပ်ကို ပြီးပြတ်အောင်လုပ်ဖို့ ဘာတွေလိုနေသလဲ” ဆိုတာပါ။ လိုတာကိုသိပြီဆိုရင် သတိနဲ့ အလုပ်ကို ပြီးပြတ်အောင်လုပ်လိုက်ပါ။ ပြီးပြတ်အောင် မလုပ်ထားတဲ့ အလုပ် ၅ ခု ရှိနေရင် အလုပ်တစ်ခုကို ပြီးပြတ်အောင် လုပ်လိုက်တာက ပိုပြီးအကျိုးရှိစေပါတယ်။

ဒါဆို အလုပ်တွေပြီးအောင် ဘယ်လိုလုပ်ရမလဲ။ ဒါနဲ့ပတ်သတ်ပြီး ကျွန်တော်ဖတ်မှတ်လေ့လာထားတဲ့ နည်းလေးတစ်ခုရှိပါတယ်။ How to get from where you are to where you want to be စာအုပ်လေးထဲက အလုပ်ပြီးစေမယ့် “D” လေးလုံးနည်းပါ။

အလုပ်ပြီးစေမယ့် D လေးလုံးနည်း ?️

အဲဒါတွေကတော့

1. Do It (လုပ်လိုက်ပါ )
2. Dump It ( ပယ်လိုက်ပါ )
3. Delay It ( ဆိုင်းငံ့ထားပါ )
4. Delegate It (တာဝန်ခွဲပေးပါ) တို့ ဖြစ်ကြပါတယ်။

အဲဒါကို ဥပမာလေးနဲ့ ကျွန်တော်ရှင်းပြပါမယ်ခင်ဗျာ။

အလုပ်တစ်ခုကို စစ်လိုက်တယ်။ အဲဒါကို လုပ်စရာလိုသလား၊ ကိုယ့်အတွက် အသုံးဝင်လားလို့ မေးပါ။ ဘာမှလုပ်စရာမလိုသလို အသုံးလည်းမဝင်ဘူးဆိုရင် အဲဒီအလုပ်ကို ပယ်လိုက်ပါ။ (Dump It)။

တကယ်လို့ အဲဒီအလုပ်ကို ၁ဝ မိနစ်အတွင်း လုပ်လို့ရရင် အချိန်မဆွဲဘဲ ချက်ချင်းလုပ်လိုက်ပါ (Do It)။

အဲဒီအလုပ်ကို အချိန်ကြာကြာယူပြီးမှ လုပ်လို့ရမယ်၊ ဒါမှမဟုတ် တခြားသူတွေနဲ့ ဆွေးနွေးညှိနှိုင်းဖို့လိုတယ်ဆိုရင် ဆိုင်းငံ့ထားလိုက်ပါ (Delay It)။

တစ်ယောက်တည်း မလုပ်နိုင်ရင်၊ ဒါမှမဟုတ် အချိန်မပေးနိုင်ရင် တစ်စုံတစ်ယောက်ကို တာဝန်ခွဲပေးလိုက်ပါ(Delegate It)။

တာဝန်ပေးလိုက်တဲ့သူကိုလည်း အလုပ်ပြီးဆုံးကြောင်း ကိုယ့်ဆီပြန်လည် သတင်းပို့ခိုင်းပါ။ ဒါမှလည်း အဲဒီအလုပ်ပြီးသွားကြောင်းကို သိမှာပေါ့။

ဒီနည်းလေးဟာ ကျွန်တော်ကိုယ်တိုင် အသုံးပြုနေတဲ့ နည်းဖြစ်ပါတယ်။ စာဖတ်သူလေးလည်း အသုံးချကြည့်ပါ။ တကယ်အကျိုးရှိတယ်ဆိုတာကို တွေ့ရပါလိမ့်မယ်ခင်ဗျာ။

ကောင်းသောနေ့ရက်လေးပါ။

Haruki