မျက်နှာဖုံးရှင်

အမှတ်တရနန်းတော်ကြီးကို
တခမ်းတနားဆောက်ပြီး
ကျွန်တော့်ရက်စွဲတွေကို ဆေးခြယ်ခဲ့တာ
အတိတ်ဆိုတဲ့ ပြဇာတ်ငယ်လေးထဲပေါ့
အပြုံးတစ်ခက်ကို ရင်ခွင်ထဲလာပျိုးတော့
ညရဲ့ပိုးစုန်းကြူးလေးလို
အမှိအခိုကင်းမဲ့တဲ့ ရယ်သံတွေဝေလို့
အင်းလေ... မျက်နှာဖုံးအောက်က
ရက်စက်လှတဲ့ နှလုံးသားက
လှည့်စားမှုဗေဒမှာ ကြိတ်ပျော်ခဲ့ဖူးတာပေါ့

ကျွန်တော့်စက္ကန့်တွေကို အုပ်စိုးတော်မူခဲ့သော
မျက်နှာများတဲ့ ရှင်ဘုရင်လေးက
ထာဝရဆိုတဲ့ ဝေါဟာရနဲ့
ဘယ်ဘက်အေးရိပ်လေးဆီ ခိုဝင်လာတော့
အနာဂတ်ဆိုတဲ့ နိဒါန်းတွေသီရင်း
သက်ဆုံးတိုင်နဲ့ နိဂုံးချုပ်ရတဲ့ ကဗျာလေးက
အဲ့အချိန်က လန်းလို့ပေါ့
အခုများတော့ ဆူးပန်းတွေသာ
အကြိမ်ကြိမ် ပွင့်စေခဲ့တယ် မျက်နှာဖုံးရှင်ရယ်...

ပျော်ခဲ့ဖူးတဲ့ မှတ်ဉာဏ်တွေ
ခြိမ်းခြောက်တဲ့ ဒီမိုးသည်းထဲမှာ
မဖာတည်းနိုင်တဲ့ ဒဏ်ရာတွေကို
ဟန်ဆောင်နိုင်လွန်းသူ မျက်နှာဖုံးရှင်ရယ်...
ကျွန်တော်ပေးတဲ့ အကယ်ဒမီနဲ့အတူ
ပြန်ရုတ်သိမ်းလိုက်ပါတော့လား...။ ။

လူ့လောကမှာ ဟန်ဆောင်မျက်နှာဖုံး တပ်ထားတဲ့ လူတွေများစွာ ရှိပါတယ်။ သတိထားပြီး ပေါင်းသင်းကြပါ။ မိမိကိုယ်တိုင်လည်း မျက်နှာဖုံးရှင်မဖြစ်အောင် ကြိုးစားနေထိုင်ကြပါရှင်။

#thoonkari
#sarphat

စာဖတ်သူလေးတွေ ကိုယ်စိတ်နှစ်ဖြာ ရွှင်လန်းကြပါစေရှင်?

စာဖတ်သူတစ်ယောက်ချင်းစီ တစ်ယောက်ချင်းစီတိုင်းကို အစဉ်အမြဲ ကျေးဇူးတင်လျက်...