ကယ်လိုရီတွက်ပြီးစားရင်း ပေါင် ၂၀ အထိဝိတ်ချကြမယ်။

ကျွန်မတို့လူတစ်ဦးချင်းစီမှာ သူ့ရဲ့ကိုယ်အလေးချိန်နဲ့ အရပ်အမောင်းအပေါ်မူတည်ပြီး တစ်နေ့တာစားသုံးရမယ့် ကယ်လိုရီပမာဏတွေရှိကြပါတယ်။
အဲ့ပမာဏထပ်လျှော့ပြီးစားတဲ့အခါ ဝိတ်ကျလာသလို၊ အဲ့ထက်ပိုပြီးစားတဲ့ရက်တွေဆက်လာတဲ့အခါ ဝိတ်တတ်လာပါလိမ့်မယ်။

ဒါဆို ကယ်လိုရီတွက်ပြီးစားတာ တကယ်ဝိတ်ကျလားဆိုတာကို ပြန်ဖြေရရင် ကယ်လိုရီစားသုံးမှုပမာဏလျော့ကျလာတဲ့အလျောက် ဝိတ်လည်းကျပါတယ်။

ဒါဆို ကိုယ်တစ်နေ့တာစားသင့်တဲ့ ကယ်လိုရီပမာဏကို ဘယ်လိုတွက်ချက်လို့ရနိုင်မလဲ။

လူတစ်ဦးနဲ့ တစ်ဦး ကိုယ်အလေးချိန်၊ အရပ်အမောင်း၊ ကိုယ်လက်လှုပ်ရှားမှုပမာဏတွေမတူညီတာကြောင့် တစ်နေ့တာမှာ ကိုယ်စားသုံးသင့်တဲ့ ကယ်လိုရီပမာဏအမျိုးမျိုးရှိနိုင်တယ်။

သို့ပေမယ့် သာမာန်လူတစ်ဦး အနည်းဆုံးအနေနဲ့ တစ်နေ့ကို ကယ်လိုရီ ၁၂၀၀ စားသုံးသင့်တယ်လို့ ပညာရှင်များက ဆိုကြပါတယ်။

ဒီတော့ ကျွန်မတို့ ဝိတ်ကျဖို့အတွက် ဒီထပ်လျှော့စားသင့်တာလား။

စဥ်းစားကြည့်လိုက်ကြရအောင်။ ကျွန်မတို့အနေနဲ့ တစ်နေ့ကို ထမင်း ၃ နပ်စားတယ်။ ကော်ဖီတစ်ခွက်သောက်တယ်။ ညဘက် အအေးလေးသောက်တယ်ဆိုပါစို့။

ထမင်းတစ်နပ်မနက်ခင်းမှာ ထမင်းကြော်တစ်ပွဲ (ရိုးရိုး) - ၃၄၀ ကယ်လိုရီဝန်းကျင် နဲ့ ကြက်ဥကြော်တစ်လုံး - ၉၀ ကယ်လိုရီဝန်းကျင် စားတယ်။ ပြီးတော့ ကော်ဖီမစ်တစ်ထုပ် - ၁၀၀ ကယ်လိုရီဝန်းကျင် သောက်တယ်။ ဒါဆို မနက်စာမှာ စုစုပေါင်း - ၅၃၀ ကယ်လိုရီဖြစ်သွားပြီ။

ကဲ နေ့လည်စာမှာ ထမင်းဖြူနဲ့ ကြက်သားဆီပြန်၊ ဂေါ်ဖီကြော်လေးနဲ့ တစ်ပွဲ - ၆၈၀ ကယ်လိုရီဝန်းကျင်၊ အချိုတည်းတဲ့ Brownie လေးတစ်တုံး - ၂၂၀ ကယ်လိုရီဝန်းကျင် စားလိုက်တယ်ဆိုရင်ပဲ ကျွန်မတို့တစ်နေ့တာ ကယ်လိုရီပမာဏက ၁၄၃၀ ကျော်သွားပြီ။

ဒီတွက်ထားတဲ့ထဲမှာ ညစာမပါဘူး။ ညနေသူငယ်ချင်းတွေနဲ့ဆိုင်ထိုင်တဲ့အခါ စားတဲ့ သရေစာမပါသေးဘူး။ ဒါဆို ကျွန်မတို့က ကယ်လိုရီ ၁၂၀၀ အထိ ချက်ချင်းလျှော့ပစ်ဖို့ မဖြစ်နိုင်သလို လိုလည်းမလိုအပ်သေးပါဘူး။

ဒါဆို ဝိတ်ကျစေဖို့ ကယ်လိုရီဘယ်လိုလျှော့စားမလဲ။

တစ်နေ့တာ ကိုယ်ပျမ်းမျှစားနေတဲ့ ကယ်လိုရီပမာဏကို တွက်ချက်ကြည့်ပါ။ ဥပမာ ကိုယ်က မနက်၊နေ့လည်၊ည (၃) နပ်ပေါင်း ၂၅၀၀ ကယ်လိုရီလောက်စားတယ်ဆိုရင် အဆိုပါ ကယ်လိုရီပမာဏထပ် ၃၀၀ လောက်အရင်လျှော့ပြီးစားကြည့်ပါ။ လက်ရှိဝိတ်ထပ် အနည်းနဲ့အများဆိုသလို ကျလာပါလိမ့်မယ်။ အဲ့ဒီနောက်မှ ကိုယ်လိုရင်လိုသလို ကိုယ်ချချင်တဲ့ ဝိတ်ပမာဏရောက်တဲ့အထိ ဆက်ထိန်းရင်းစားသွားလို့ရပါပြီ။

ကယ်လိုရီ ဘယ်လိုတွက်ချက်ရမလဲ။

အများအားဖြင့် ကုန်စုံဆိုင်များနဲ့ စူပါမားကတ်တွေမှာ ရောင်းတဲ့ စားသောက်ကုန်တွေမှာတော့ ထုတ်ပိုးထားတဲ့ Packaging မှာ အကြမ်းဖျဥ်းပါဝင်တဲ့ ကယ်လိုရီကို ဖော်ပြထားလေ့ရှိပါတယ်။ အာဟာရညွှန်းကိန်းများမှာ ဖတ်ရှုနိုင်ပါတယ်။ ဒါမှမဟုတ် ကိုယ်စားသုံးလိုက်တဲ့အစားအစာရဲ့ ခန့်မှန်းခြေကယ်လိုရီများကို အင်တာနက်မှာ လွယ်လင့်တကူရှာဖွေနိုင်ပါတယ်။ ဥပမာ - Malaxing Guo Calories စသည်ဖြင့် ရိုက်ပြီး ရှာနိုင်ပါတယ်။

ဆက်ပြီးတော့ ကယ်လိုရီလျော့စားတဲ့အခါ ကျွန်မကိုယ်တိုင် အသုံးပြုခဲ့တဲ့ နည်းလမ်းတွေကိုလည်း ဆက်လက်မျှဝေသွားပါမယ်။

ကျွန်မဝိတ်ချနေစဥ်က ကယ်လိုရီ ၁၂၀၀ ပဲ စားပါတယ်။ အဲ့ဒီအတွက် ကိုယ်စားချင်တာလေးတွေလည်းစားရင်း နည်းလမ်း ၃ ခုကိုမျှပြီးသုံးခဲ့ပါတယ်။

၁။ အသီးအရွက်များများစားတဲ့နည်း

အသီးအရွက်တွေက ကယ်လိုရီနည်းကြပါတယ်။ ထမင်း ၄ ဇွန်းလောက်က ကယ်လိုရီ ၁၅၀ လောက်ရှိပေမယ့် ဖရဲသီးအလုံးတစ်ဝက်လောက်က ၅၀ ကယ်လိုရီလောက်ပဲရှိတာပါ။ ဒါကြောင့် အသီးအရွက်ကို များများပိုစားတဲ့နည်းကို သုံးပါတယ်။ ဗိုက်လည်းပြည့်စေပါတယ်။

၂။ တစ်နပ်လျော့စားတဲ့နည်း

တစ်ခါတစ်လေ ကျွန်မ မာလာရှမ်းကောတွေ၊ ဟော့ပေါ့တွေစားချင်တဲ့နေ့တွေရှိတဲ့အခါ စားလိုက်ပေမယ့် အဲ့နေ့ တစ်နပ်လျော့စားလိုက်တာမျိုးပါ။ ဒီတော့ကိုယ်ကြိုက်တာကိုလည်းစားလို့ရတဲ့အပြင် ဝိတ်လည်း အလွယ်တကူမတတ်တော့ဘူးပေါ့။

၃။ ပမာဏလျော့စားတဲ့နည်း

အရင်က ကိုယ်က ထမင်းကို ၂ ပန်းကန်စားဖြစ်တယ်ဆိုရင် ၁ ပန်းကန်ပဲစားတော့တာမျိုး၊ ကြေးအိုးပွဲသေးပဲစားလိုက်တာမျိုး၊ တစ်ယောက်တစ်ဝက်ခွဲစားလိုက်တာမျိုးပေါ့။ ဒီလို ပမာဏလျော့စားခြင်းကလည်း ကိုယ်စားချင်တာစားနိုင်တဲ့အပြင် ဝိတ်လည်းတော်တော်ထိန်းနိုင်စေပါတယ်။

ကဲ အခုဆိုရင်တော့ ကယ်လိုရီတွက်ပြီးစားတဲ့အကြောင်းရော ကျွန်မကိုယ်တိုင်သုံးခဲ့တဲ့ နည်းလမ်းလေးတွေရောမျှဝေပေးခဲ့တာဖြစ်ပါတယ်။ ဒီလို ကယ်လိုရီတွက်စားရင်း ကျွန်မ အရင်က ၁၄၅ ကနေ အခုဆို ၁၀၉ပေါင်ဝန်းကျင်နဲ့ ဆက်လက်ထိန်းထားနိုင်ခဲ့ပါတယ်။
တကယ်သေချာတွက်ပြီးစားတတ်ရင် ပေါင် ၂၀ ဝန်းကျင်လောက်အထိ ကျနိုင်တဲ့ နည်းလမ်းလေးတွေဖြစ်လို့မျှဝေပေးလိုက်ပါတယ်။ နောက်နေ့တွေမှာ ပြန်တွေ့ပါမယ်နော်။