ဆရာကြီးရွှေဥဒေါင်း တစ်သက်တာမှတ်တမ်းနှင့် အတွေးအခေါ်များ

"စာအုပ် သုံးမျိုး"

အင်္ဂလိပ် လူမျိုးများအနက် စာပေဘက်၌ လည်း ကောင်း၊ အတွေးအခေါ်အရာ၌ လည်းကောင်း၊ စကားလုံး တိုတိုနှင့် ထိအောင် ရေးတတ်ခြင်း၌ လည်းကောင်း၊ ကပိတစ်ဆူ အဖြစ်နှင့် တင်မြှောက်ခြင်း ခံရသည့် ဖရန်ဆစ် ဘေကော်န် (Francis Bacon) က စာအုပ် သုံးမျိုး သုံးစား ရှိကြောင်း ရေးသား ဖော်ပြခဲ့ဖူးရာ ၎င်း၏ အဆုံးအဖြတ်မှာ နိုင်ငံမရွေး၊ ဘာသာမရွေး၊ စာပေလောက တစ်ခုလုံး အတွက် မှန်ကန်သည်ဟု ဆိုနိုင်သည့်ပြင် ကျွန်ုပ် ကိုယ်တိုင် မှာလည်း သူ၏ သြဝါဒအတိုင်း လိုက်နာ ကျင့်သုံးခဲ့သည်သောကြောင့် ဗဟုသုတ အလို့ငှာ တင်ပြရပါဦးမည်။ ဘေကော်န်က စာအုပ်သုံးမျိုး ရှိသည့် အနက် အချို့ စာအုပ် များမှာ မြည်းရုံမျှ မြည်းကြည့်ထိုက်သည်၊ အချို့ စာအုပ် များမှာ မျိုချ လိုက်ရသည်၊ အနည်းငယ်မျှသော စာအုပ် မျိုးမူကား ညက်ညက်ပါအောင် ဝါးချပြီး အစာကြေအောင် ချေယူထိုက်သည်ဟု ရေးခဲ့ဖူးလေသည်။ ကျွန်ုပ်သည် စာတစ်အုပ်ကို ကိုင်လိုက်သည့်အခါ မည်သည့် အမျိုးအစား တွင် ပါဝင်သည်ဟု အကဲခတ် ပြီးသည့် နောက်တွင်မှ ဖတ်ရှုလေ့ရှိ၏။ တစ်ခါတစ်ရံ၌မူ မြည်းရုံ မြည်းကြည့်စမ်း မည် ဆိုကာ ဖတ်ရှုရာမှ ညက်ညက် ဝါးချပြီး အစာကြေ အောင် ချေရဖူးသည်များလည်း ကြုံရဖူးပါသည်။ စာဖတ် ပရိသတ်အနက် မြည်းရုံသာ မြည်းရမည့် စာအုပ်မျိုးဖြင့် သာ အချိန်ကုန်ကြသည့် ရာခိုင်နှုန်းသည် အတော်များပုံ ရလေရာ အချို့မှာ ညက်ညက်ဝါးရသော အလုပ်မျိုးကို ပျင်းရိတတ်သည်နှင့် ဖတ်သော အုပ်ရေ များသော်လည်း မည်မည်ရရ ပြောပလောက်အောင် အဖတ်မတင်သူများ လည်း အမြောက်အမြား တွေ့ရဖူး၏။ ညက်ညက်ပါအောင် ဝါးဖို့လိုသည် ဆိုသော စာအုပ်မျိုးမှာ အဘိဓမ္မာ ဆန်သော စာအုပ်မျိုးကိုချည်း ဆိုလိုသည် မဟုတ်။ လူ့သဘာဝကို နက်နက်နဲနဲ ထိထိခိုက်ခိုက် ဖော်ပြ၍ စိတ်ကောင်း နှလုံး ကောင်း ဝင်လာစေတတ်သော စာအုပ်မျိုး ဟူ၍ ကျွန်ုပ် နားလည်သည်။ စိတ်ကောင်း နှလုံးကောင်း ဝင်လာသည် ဆိုခြင်းမှာလည်း ဘုရားရှိခိုးကျောင်း တက်ချင်သော စိတ် မျိုး ဖြစ်ပေါ်လာခြင်းကို ဆိုလိုသည် မဟုတ်။ တစ်ဖက်သား ကို ကြင်နာတတ်၍ မတရားခြင်းကို ရွံမုန်းတတ်သော စိတ်မျိုး ဟူ၍ ကျွန်ုပ် ဘာသာပြန်လိုသည်။ ကျွန်ုပ် အဖို့မူ မာကော်န်၏ အဆုံးအဖြတ်ကို လက်ခံရာ၌ ညက်ညက် ပါအောင် ဝါးရာသည့်စာအုပ်မျိုးကိုမှ ဖတ်ချင်သည်ဟု မဆိုလို၊ စာစုံအောင် တင် ကြိုးစားပြီး ညက်ညက်ဝါးရ အလုပ်မျိုးကိုလည်း မတွန့်ဆုတ်၊ မြည်းတန်က မြည်း၊ မျိုတန်က မျိုရခြင်းများလည်း ပါရှိပါသည်။