" ငွေသောင်ယံ ဟွန်ဒါယဉ်ကျေးမှု မေရီပိုဗေးနဲ့ အီကွေတာညများ "

နာမည်ကြီး စာရေးဆရာများ၏ စာအုပ်များဟာ အံ့ဩ မင်သက်စရာကောင်းလွန်းနေပါတယ်။

ဆရာမြသန်းတင့်ရဲ့ စာအုပ်ဖတ်ဖူးတာ ဒုတိယမြောက်စာအုပ် လို့ပဲ ညွှန်းဆိုချင်ပါတယ်။

ထား၀ယ်၊ မြိတ်၊ ကော့သောင်နှင့် တနင်္သာရီခရီးသွားခဲ့တာကို စာအုပ်တစ်အုပ်ပြန်ထုတ်ထားတဲ့ စာအုပ်လေးပါ။

ဒီဒေသမှာ ကုန်ဈေးနှုန်းအလွန်ကြီးမား၍ အစိုးရ၀န်ထမ်း များဆိုလျှင် လစာနှင့် မလောက်ငှတာကို ရေးသားထား ပါတယ်။

ပြည်တွင်းပို့ကုန်ထက် ပြည်ပပို့ကုန်ကိုသာ အဓိကထား၍ စားသုံးနေရကြောင်း ရေးသားထားပါတယ်။

ရွက်ပုန်းသီးဂီတပညာရှင်များစွာရှိပါကြောင်းနှင့် မာနအလွန် ကြီးကြောင်းကိုလည်း ရေးသားထားပါတယ်။

မြိတ်ကတ်ကြေးကိုက်၊ မြိတ်ငပိသုပ်နှင့် ကော်စွီးဆိုသည့် တရုတ်လက်ဖက်ရည်ကြမ်းနှင့် အမြည်းများကောင်းလွန်းတာ ကိုလည်း ဖော်ကျူးပြထားပါတယ်။

မြိတ်သည် မြန်မာ့ရာဘာ စိုက်ပျိုးရေးလုပ်ငန်း၏ ချက်မြှုပ်ရာ အရပ်ဖြစ်ခဲ့တာကိုလည်း သိရှိခဲ့ရပါတယ်။

သို့သော် ယနေ့ခေတ်မှာတော့ ရာဘာပင်များ၏ သက်တမ်း ရင့်လာမှုနှင့် အလုပ်သမားရှားပါးမှုကြောင့် ရေရှည်မှာ တိမ်ကော ပျောက်ကွယ်သွားမှာကို ဒီစာအုပ်မှာ ရေးသားထား ပါတယ်။

ခရီးသွားစာအုပ်တစ်အုပ်ဟာ တော်ရုံလူကိုဆို မဆွဲဆောင်နိုင် ပါဘူး၊ လကမ္ဘာမှာ လမ်းလျှောက်နေရသလိုပါပဲ၊ မသွားဖူး တော့ ဖတ်ရတာနည်းနည်းတော့ လက်မခံချင်သလို ဒီစာရေး ဆရာဟာ ဖော်ကျူးလှချည်လား၊ ညွှန်းလှချည်လား၊ ဘာညာ ပေါ့။

ဆရာမြသန်းတင့်ရဲ့ အရေးအသားကိုတော့ ရေရေလည်လည် ကြွေမိတယ်၊ ဘယ်လောက်ထိ စာဖတ်သူကို ဆွဲခေါ်သွားနိုင် လဲဆိုတော့ မြန်မာနိုင်ငံမြေပုံပြန်ရှာရလောက်တဲ့ အထိပါပဲ။

ထား၀ယ်တွေရဲ့ စကားပြောတာက တမူထူးခြားနေတာ ဟုတ်ကဲ့ကို "ခင်ဗျား ခင်ဗျား"၊ ဘယ်သူ့ကို တွေ့တွေ့ "ဦး"လို့ ခေါ်ကြတယ်ဆိုတဲ့ အဲဒေသရဲ့ ဓလေ့ကိုပါ သိရှိရပြန်တယ်။

ခရီးသွားမှတ်တမ်းကို စာအုပ်ထုတ်ထားတာ မှတ်မှတ်ရရပါပဲ စာအုပ်(၂)အုပ်ဖတ်ဖူးတယ်။ ပထမတစ်အုပ်က သိပ်မဆွဲခေါ် နိုင်ဘူး။ ဒုတိယစာအုပ်က ဆရာမြသန်းတင့်ကတော့ ဆရာ မြသန်းတင့်ပါပဲ။

ဆရာမြသန်းတင့်ဟာ စာရေးခြင်းအလုပ်နှင့်ပဲ အသက်မွေး ၀မ်းကြောင်းပြုတယ်လို့ စာအုပ်တစ်အုပ်မှာ ဖတ်ဖူးခဲ့တယ်။ ဘာသာပြန်စာအုပ်တော်တော်များများကိုလည်း ရေးသားနိုင် ခဲ့တယ်။

မကြာသေးမီ အချိန်က ကိုယ့်ရဲ့ Idol နှင့် ဆရာမြသန်းတင့် ရဲ့အကြောင်း ပြောဖြစ်ခဲ့သေးတယ်။ မြန်မာ့စာပေလောက မှာတော့ တကယ့်ဆရာကြီးပါပဲလို့ပေါ့။

လွမ်းမောခဲ့ရသော တက္ကသိုလ်နွေညများ၊ လေရူးသုန်သုန်နှင့် မမစာအုပ်များကိုလည်း ဖတ်ဖူးချင်နေပါသေးတယ်‌လေ။

ခင်ခင်ချော(ပင်းတယ)