ဟန်လင်မြို့ဟောင်း

ကမ္ဘာ့အမွေအနှစ်ဝင် ပျူမြို့ပြနိုင်ငံ

ဟန်လင်မြို့ဟောင်းသည် မြန်မာနိုင်ငံ စစ်ကိုင်းတိုင်းဒေသကြီး၊ ရွှေဘိုမြို့နယ်၏ အရှေ့တောင်ဘက် ၁၁ မိုင်ခန့်အကွာတွင် တည်ရှိပြီး၊ ကမ္ဘာ့အမွေအနှစ်စာရင်းဝင် ပျူမြို့ဟောင်းသုံးမြို့ ထဲမှ တစ်ခုအပါအဝင် ဖြစ်သည်။ မြန်မာ့သမိုင်းတွင် အရေးပါသောနေရာတစ်ခုဖြစ်သည့်အပြင် ရှေးဟောင်းသုတေသနပညာရှင်များအတွက်လည်း လေ့လာစရာများစွာရှိသော ဒေသတစ်ခုဖြစ်သည်။

သမိုင်းကြောင်းနှင့် ယဉ်ကျေးမှု

ဟန်လင်မြို့ဟောင်းသည် ဘီစီ ၂ ရာစုမှ အေဒီ ၉ ရာစု အထိ ထွန်းကားခဲ့သော ပျူခေတ်၏ အရေးပါသော မြို့ပြနိုင်ငံတစ်ခုဖြစ်သည်။ ခရစ်သက္ကရာဇ် ပထမရာစုနှစ်ဝန်းကျင်တွင် စတင်တည်ထောင်ခဲ့သည်ဟု ယူဆရပြီး၊ အေဒီ ၈ ရာစုခန့်အထိ ပျူမြို့ပြနိုင်ငံများထဲတွင် အကြီးဆုံးနှင့် အရေးအပါဆုံး မြို့အဖြစ် ရပ်တည်ခဲ့သည်။ နောက်ပိုင်းတွင်မှ သရေခေတ္တရာမြို့က ပိုမိုထင်ရှားလာခဲ့သည်။

မြို့ဟောင်းသည် စတုဂံပုံစံ ရှိပြီး မြို့ရိုးများနှင့် ကျုံးများဖြင့် ဝန်းရံထားသည်။ မြို့ရိုးအလျားမှာ တောင်မြောက် ၂ မိုင်နီးပါးရှိပြီး အရှေ့အနောက် ၁ မိုင်ကျော် ကျယ်ဝန်းသည်။ ယခင်က မြို့တံခါး ၂၄ ပေါက်ရှိသည်ဟု ဆိုသော်လည်း လက်ရှိတွင် အရှေ့ဘက်မှ ငါးပိအိုးတံခါး၊ အနောက်ဘက်မှ ပျားကြီးတောင့်တံခါး၊ တောင်ဘက်မှ တံခါးတော် နှင့် မြောက်ဘက်မှ တကန်သာတံခါး စသည့် အချို့တံခါးများသာ ကျန်ရှိတော့သည်။

ဟန်လင်မြို့ဟောင်းအတွင်း ရှေးဟောင်း

အဆောက်အဦနှင့် အုတ်ကုန်းများကို အများအပြားမတွေ့ရတော့သော်လည်း မြို့ဟောင်းတောင်ဘက်နားရှိ ဟန်လင်ရွာကြီးနှင့် ပတ်ဝန်းကျင်တွင် ရှေးဟောင်းဘုရားများကို ဖူးတွေ့နိုင်သည်။

အထင်ရှားဆုံးများမှာ သီရိဓမ္မာသောကမင်း၏ ကောင်းမှုတော်ဖြစ်သော ရွှေကူကြီးစေတီ၊ ကျန်စစ်သားမင်း၏ ကောင်းမှုတော်ဖြစ်သော ရွှေအင်ပင်စေတီ၊ အလောင်းစည်သူမင်း၏ ကောင်းမှုတော်ဖြစ်သော ရွှေယပ်တော်စေတီ၊ ဒါတင်္ဂရာဇ်အမတ်ကြီး၏ ကောင်းမှုတော်ဖြစ်သော ရွှေဂူသာစေတီ နှင့် သမန္ထဘဒ္ဒရာ အမတ်ကြီး၏ ကောင်းမှုတော်ဖြစ်သော ရွှေပန်းနှော (ယခုအခါ ရွှေပန်းတော) စေတီ တို့ဖြစ်သည်။

ရှေးဟောင်းသုတေသန တူးဖော်မှုများအရ ဟန်လင်မြို့ဟောင်းမှ ပျူကျောက်စာများ၊ ပျူဒင်္ဂါးများ နှင့် အရိုးအိုးများ ကို တွေ့ရှိခဲ့ရသည်။ ၎င်းတို့က ပျူယဉ်ကျေးမှု ထွန်းကားခဲ့ပုံကို သက်သေပြနေသည်။

လက်ရှိအခြေအနေနှင့် အနာဂတ်

ဟန်လင်မြို့ဟောင်းကို ၂၀၁၄ ခုနှစ်၊ ဇွန်လ ၂၂ ရက်နေ့တွင် ယူနက်စကို ကမ္ဘာ့အမွေအနှစ်စာရင်းဝင်နေရာ အဖြစ် သတ်မှတ်ခဲ့သည်။ လက်ရှိတွင် ပြတိုက်တစ်ခုနှင့် ရှေးဟောင်းသုတေသနနေရာများကို ထိန်းသိမ်းစောင့်ရှောက်ထားသည်။ သို့သော်လည်း ကမ္ဘာလှည့်ခရီးသွားလုပ်ငန်းအတွက် လိုအပ်သော အခြေခံအဆောက်အဦများ (ဥပမာ- တည်းခိုခန်း၊ စားသောက်ဆိုင်၊ လမ်းပန်းဆက်သွယ်ရေး) စသည်တို့တွင် အားနည်းချက်များ ရှိနေသေးသည်။

ဟန်လင်မြို့ဟောင်းသည် ရှေးဟောင်းသမိုင်းနှင့် ယဉ်ကျေးမှုကို လေ့လာလိုသူများအတွက် အလွန်စိတ်ဝင်စားစရာကောင်းသော နေရာတစ်ခုဖြစ်သည်။ မြန်မာ့သမိုင်း၏ အရေးပါသော အခန်းကဏ္ဍတစ်ခုကို ဖော်ပြနေသည့် ရှေးဟောင်းအမွေအနှစ်များထဲမှ တစ်ခုလည်းဖြစ်သည်။

#Moe