မိမိ၏စိတ်အခြေအနေကို မိမိကိုယ်တိုင် ဆန်းစစ်ခြင်း

လူတိုင်းလူတိုင်းက "မိမိရဲ့ စိတ်အခြေအနေက ဘယ်လိုဖြစ်နေလဲ? စိတ်အခြေ‌အနေ ခံစားချက် ကောင်းရဲ့လား? ဆိုးနေသလား?" ဆိုတာကို မည်သူမဆို သိချင်ကြမှာ အမှန်ပါပဲရှင်။

ဆိုတော့ ဒီနေ့မှာ မြရဲ့ ဆောင်းပါးလေးကို ဖတ်ရှုပြီး မိမိရဲ့ စိတ်အခြေအနေကို မိမိကိုယ်တိုင် ဆန်းစစ်ကြည့်လိုက်ကြရအောင်နော်။

ပထမဦးစွာ မိမိရဲ့ စိတ်အခြေအနေကို ဆန်းစစ်ကြည့်မယ်ဆိုရင် -

• နံပါတ် - (၁) စာဖတ်သူလေးကို ဘယ်အရာတွေ၊ ဘယ်သူတွေက ပျော်ရွှင်စေသလဲ?

လူဆိုတဲ့အမျိုးက ကိုယ့်အတွက် အကျိုးရှိပြီး ပျော်ရွှင်စေတာကိုပဲ သဘောကျကြပါတယ်။ စာဖတ်သူလေးကို ဘယ်အရာတွေက ပျော်ရွှင်စေလဲ? ပျော်ရွှင်ပြီး စိတ်ကျေနပ်မှုရတာကိုပဲ စာဖတ်သူလေးတွေ လုပ်ကြမှာပါ။ စိတ်ဒုက္ခတွေရောက်ပြီး စိတ်ညစ်စေမဲ့ အရာတွေကို ဘယ်သူမှ မလိုလားကြပါဘူးရှင်။

နောက်တစ်ခုက စာဖတ်သူလေးက တစ်ယောက်ယောက်နဲ့ စကားပြော (သို့) စာပို့ပြီး ပြောတဲ့အခါ စာဖတ်သူလေး ဘယ်သူနဲ့ ပြောတာက စိတ်ကို ပျော်ရွှင်စေလဲ? စာဖတ်သူလေးရဲ့ အပူအပင်တွေကို အေးငြိမ်သွားစေလဲ? ဆိုတာကို ကြည့်ပြီးတော့ စာဖတ်သူလေးကို စိတ်အေးချမ်းမှု ပေးစွမ်းနိုင်သူနဲ့သာ စကားပြောချင်စိတ်ရှိပါလိမ့်မယ်ရှင်။

• နံပါတ် - (၂) စာဖတ်သူလေးကို ဘယ်အရာတွေ၊ ဘယ်သူတွေက မပျော်ရွှင်စေဘူးလဲ?

စာဖတ်သူလေးကို "ဘယ်အရာတွေက မပျော်ရွှင်စေဘူးလဲ?" ဆိုတာကို သိရင် အဲဒီအရာကို နောက်ထပ်မလုပ်မိအောင် ဝေးဝေးက ရှောင်ကြဉ်နိုင်ပါတယ်ရှင်။ ပြီးတော့ စာဖတ်သူလေးက သူငယ်ချင်းတစ်ယောက်ယောက်နဲ့ စကားပြောတဲ့အခါမှာ သူငယ်ချင်းက ကိုယ့်ကို အမြဲစိတ်သောကရောက်အောင်၊ စိတ်မသက်မသာဖြစ်အောင် လုပ်နေရင် အဲဒီသူငယ်ချင်းနဲ့ ရေရှည်ဆက်ဆံဖို့ဆိုတာ မလွယ်ကူတော့ပါဘူးရှင်။ ကိုယ့်အတွက် မကောင်းတဲ့သူ၊ စိတ်ညစ်စရာတွေပဲ သယ်ဆောင်လာသူကိုတော့ ဘယ်သူက သဲသဲလှုပ် ချစ်နေပါဦးမလဲ။

• နံပါတ် - (၃) စာဖတ်သူလေးအနေနဲ့ ဘာဆက်လုပ်မလဲ?

ဒီတတိယအချက်ကတော့ စာဖတ်သူလေးကိုယ်တိုင် စိတ်ဆုံးဖြတ်ချက် ချရမယ့်အချိန်ကို ရောက်ရှိလို့လာပါပြီရှင်။ စာဖတ်သူလေးရဲ့ စိတ်အခြေအနေက ကြည်လင်အေးချမ်းပြီး Positive Vibesများဖို့ဆိုရင် မြပြောခဲ့တဲ့ ပထမအချက်နဲ့ ဒုတိယအချက်ကို နှိုင်းယှဉ်ကြည့်ပြီး မိမိဘဝအတွက် ဆက်လက်လက်တွဲသင့်သူကို လက်တွဲပြီး လမ်းခွဲသင့်သူကို သံယောဇဉ်မတွယ်ညိဘဲ လမ်းခွဲလိုက်တာက မိမိဘဝအတွက် ကောင်းကျိုးတွေ ရရှိလာပါလိမ့်မယ်ရှင်။

ဆိုတော့ မြ ရေးသားခဲ့တဲ့ "မိမိ၏စိတ်အခြေအနေကို မိမိကိုယ်တိုင် ဆန်းစစ်ခြင်း" ဆောင်းပါးလေးကို ဖတ်ရှုလေ့လာပြီးချိန်မှာ မြရဲ့ စာဖတ်သူလေးတွေ လူကောင်းနဲ့ လူဆိုးကို ရှင်းရှင်းလင်းလင်း သိမြင်နိုင်ပြီး ‌လူရွေးမှန်ကြပါစေလို့ ဆုမွန်ကောင်း တောင်းပေးလိုက်ရပါတယ်ရှင်။

စာဖတ်သူများအားလုံးကို ချစ်ခင်လေးစား ကျေးဇူးတင်လျက်.....

✍️ မြ (စံကားဝါမြေ)

#SarPhat
#Mya_Kyaukpadaung
9.9.2024(Monday)