တွံတေးတံတားပေါ်က(ကဗျာ)

ဘယ်လို ခေါ်လဲဆို
တွမ်တေး တဲ့
တဝမ်တေး တဲ့
နောက် တုံတလ တဲ့
နောက်တော့ ဒလ တဲ့
အခုတော့ တွံတေး

မြန်မာ အစ ရွှေတိဂုံက တဲ့
ဒါဆို ကဘင်းကို မထားခဲ့နဲ့
ကုန်သည် ညီနောင်ကို မထားခဲ့နဲ့
မောင်းတီ စေတီမှာ မထားခဲ့နဲ့

တွမ်တေး တောင်ကုန်းပေါ်က မြို့
သိပ်လှတာပေါ့
ဆောင်းဆို အေးတယ်
သိသိသာသာ စိမ့်တယ်
ဆေးလိပ်လေးနဲ့ဆို အချမ်းပြေတယ်

တဝမ်တေး
ညီမလေးတို့ရွာ
သိပ်လှတာပေါ့
ဖလိပ်ကြီး ကျိုက်သလဲ
အချောတွေ ပေါ မှ‌ ပေါတဲ့

ဒလ
လာ မွန်-‌ဗမာ နှစ်၄၀ စစ်ပွဲထဲ
ခဏလေး သွားရအောင်
ဗောလောကျန်းဒေါ အဖေနဲ့ တူတဲ့သား
အဖေလို ဖြစ်ချင်မပေါ့
အဖေစရိုက်ပါ မပေါ့
အဖေ့လက်နဲ့ပဲ သေတယ်
အဖေနဲ့ စစ်ပြန်တိုက်မယ်တဲ့
‌အဖေ့ကို နိုင်ပါရစေ မပြောခဲ့ဘူး

တုံတလ ဟာ စစ်မြေပြင်ပဲ
ဆင် ဆင်ချင်း
မြင်း မြင်းချင်း
လူ လူချင်း စစ်ခင်းတယ်
သေရဲတဲ့ ကောင်တွေချည်း
သွေးချင်းချင်းရဲ

မင်းရဲကျော်စွာဟာ
တုံတလ မှာဆုံးတယ်
ဒလ မှာ ဆုံးတယ်

တွံတေး ဖြစ်လာတော့
တွံတေး တူးမြောင်းထဲ ခုန်ချတာပေါ့
ဘာတွေ့ရမလဲ

အရှေ့ကိုကူးသွား
ဒလရှိတယ်
ဆက်သွား
ဒဂုံဆံတော်ရှင် မင်းဖူးရမယ်

အနောက်ကိုကူးသွား
ကမ်းနားမှာ တံငါလှေတွေ
ကမ်းနားမှာ အိုးတွေ
ရှယ်အိုး မြေအိုး
အမျိုးအကြောင်းပြောတဲ့ အိုးတွေ
ကမ်းပေါ်တက်
ဆံတော်ရှင်ကို ဖူးပြီးပြန်မယ်

တံတားပေါ်က
ဘာမြင်လဲဆို
ဒါတွေ မင်းမြင်လိမ့်မယ်
ပစ္စုပ္ပန်ကနေ အတိတ်ထိ
ရွေ့သွားတဲ့ တိမ်တွေလို
တစ်လိပ်ချင်း မြင်ရမယ်

#ခန့်သော်မောင်