စွဲလမ်းမှုကင်းတဲ့ အချစ်

မပိုင်ရတာတွေ များလှတဲ့
ဒီလောက ဉယျာဉ်ကြီးထဲမှာ
မှီခိုစရာ ပခုံးလေးတစ်ဖက်တွေ့ရင်
စွဲလမ်းမှုခါးသက်သက်တွေ နေရာဝင်ယူလေတော့
ပူလောင်မှုတွေက တဟုန်ထိုး
လှလှပပနဲ့ ပင်မြင့်မှာဝင့်ကြွားလို့

စကားနဲ့သတ်ရင် သေရပါတဲ့
ရပ်ဝန်းတွေရဲ့ အဝေးဆီ
စိတ်ဆန္ဒတွေ ခရီးနှင်ချင်ပါလည်း
ဒီခန္ဓာကြီးက လိုက်မလာလေဘဲ
ခက်လှပါချည်ရဲ့ဆိုတဲ့ သူတစ်ပါးအပေါ်ထားတဲ့
ဒီသံယောဇဉ်တွေကြောင့်
အတိတ်ကမ္ဘာထဲလည်း ပိတ်မိဖူးပါတယ်လေ

အင်း...ကော်ဖီတွေလည်း အေးပြီ
ငါလည်း လက်လျော့လိုက်ပြီ
ဒီသံယောဇဉ်တွေကြောင့်
နာနာကျင်ကျင် ကြီးထွားလာရတဲ့ စွဲလမ်းမှုတွေကို
ငါကိုယ်တိုင် ပျော်ပျော်ကြီး ဖြတ်တောက်လိုက်တဲ့အခါ
ငါရှာတွေ့သွားတဲ့အရာက
ကိုယ့်ကိုယ်ကိုယ် ချစ်နည်းနဲ့
မှန်ကန်တဲ့ ချစ်နည်းပဲ။ ။

• ကျွန်မတို့တွေက တစ်ခြားသူတွေကို ချစ်ရင်း ကိုယ့်ကိုယ်ကိုယ် ချစ်ဖို့မေ့နေတတ်ကြပါတယ်။ သူတစ်ပါးကိုချစ်ရင်း အစွဲအလမ်းတွေ ကြီးလာတတ်ကြပါတယ်။ ချစ်ခြင်းက ကြည်နူးရပေမဲ့ အစွဲအလမ်းတွေကြောင့် ပူလောင်ရတတ်ပါတယ်။ ဒါကြောင့် အစွဲအလမ်းတွေ ဖြတ်ပြီး ကိုယ့်အတွက် ကိုယ့်ကိုယ်ကိုယ်ချစ်ကြပါ။ ကိုယ့်အတွက် ကိုယ်တွေးပြီး စွဲလမ်းမှုကင်းတဲ့အချစ်နဲ့ လှလှပပရှင်သန်ကြပါလို့ မှာကြားချင်ပါတယ်ရှင်။ ။

#thoonkari
#sarphat

စာဖတ်သူလေးတွေ ကိုယ်စိတ်နှစ်ဖြာ ရွှင်လန်းကြပါစေရှင်?

စာဖတ်သူတစ်ယောက်ချင်းစီ တစ်ယောက်ချင်းစီတိုင်းကို အစဉ်အမြဲ ကျေးဇူးတင်လျက်...